تاثیر29 اکتوبر ۲۰۲۶:- ایس -ایم- حسن
نئی دہلی، 29 اکتوبر: ملک کی سب سے بڑی ری بانڈڈ پولی یوریتھین (پی یو) فوم تیار کرنے اور برآمد کرنے والی کمپنی سروَا فوم انڈسٹریز لمیٹڈ نے اسکاٹ لینڈ میں ایک نئی مینوفیکچرنگ یونٹ قائم کرنے کے لیے 60 لاکھ پاؤنڈ کی ابتدائی سرمایہ کاری کا اعلان کیا ہے۔ یہ اسکاٹ لینڈ میں کمپنی کی مجوزہ توسیع کا پہلا مرحلہ ہے۔
اسکاٹ لینڈ کے فرسٹ منسٹر جان سوئنی نے جمعرات کو سروَا فوم کے دفتر کے دورے کے دوران اس اعلان کا خیرمقدم کیا۔ مجوزہ سرمایہ کاری کا مقصد یورپ میں کمپنی کی مینوفیکچرنگ موجودگی اور سپلائی چین کو وسعت دینا بھی ہے۔ اس سے جغرافیائی و سیاسی غیر یقینی صورتِ حال، سپلائی چین میں رکاوٹوں اور نقل و حمل کے زیادہ اخراجات جیسے خطرات کو کم کرنے میں مدد ملے گی۔ اس کے علاوہ ہندوستان سے باہر کی منڈیوں میں آپریشنل کارکردگی بہتر ہوگی، اخراجات کا بہتر انتظام ممکن ہوگا اور ہندوستان و اسکاٹ لینڈ کے درمیان اقتصادی تعلقات مضبوط ہوں گے۔