تاثیر4 نومبر ۲۰۲۶:- ایس -ایم- حسن
امیٹھی، 4 نومبر: دہلی سے پرتاپ گڑھ جا رہی پدماؤت ایکسپریس میں بدھ کے روز اس وقت نومولود کی کلکاریاں گونج اٹھیں، جب ایک حاملہ خاتون نے چلتی ٹرین میں بچے کو جنم دیا۔ امیٹھی ریلوے اسٹیشن پہنچنے سے پہلے ہی خاتون کا زچگی کا عمل مکمل ہو گیا۔ ٹرین میں موجود خواتین نے زچگی کے دوران ان کی مدد کی۔ ریلوے پولیس نے امیٹھی اسٹیشن پر خاتون اور نومولود کو اتار کر محکمہ صحت کو اطلاع دی۔ اس کے بعد 108 ایمبولینس اور طبی عملے کی مدد سے دونوں کو کمیونٹی ہیلتھ سینٹر (سی ایچ سی) امیٹھی پہنچایا گیا، جہاں ڈاکٹروں کی نگرانی میں ماں اور نومولود دونوں صحت مند ہیں۔
پرتاپ گڑھ ضلع کے سانگی پور تھانہ علاقے کے پورے چھوٹی اسائی، اماوا کی رہنے والی نرملا ورما (35) زوجہ ہری کیش کمار دہلی سے پرتاپ گڑھ جانے کے لیے پدماؤت ایکسپریس میں سوار ہوئی تھیں۔ وہ اپنے شوہر کے ساتھ دہلی میں رہتی ہیں۔ منگل کی شام ان کے شوہر انہیں نئی دہلی ریلوے اسٹیشن پر ٹرین میں بٹھا کر واپس لوٹ گئے تھے۔ اس کے بعد نرملا اکیلی ہی دورانِ حمل پرتاپ گڑھ کے لیے روانہ ہوئی تھیں۔