تاثیر4 نومبر ۲۰۲۶:- ایس -ایم- حسن
نئی دہلی، 4 نومبر:دہلی ہائی کورٹ میں دہلی پولیس کے معطل اے سی پی منسوی وششٹھ اور دیگر افسران کے خلاف کارروائی کا مطالبہ کرنے والی وکلا کی عرضی پر 6 نومبر کو سماعت ہوگی۔
بدھ کے روز وکلا نے قائم مقام چیف جسٹس نتن واسودیو سامبرے کی سربراہی والی بنچ کے روبرو معاملہ پیش کرتے ہوئے فوری سماعت کی استدعا کی، جس کے بعد عدالت نے 6 نومبر کو سماعت کرنے کا حکم دیا۔ 3 نومبر کو چند وکلا نے قائم مقام چیف جسٹس نتن واسودیو سامبرے کی سربراہی والی بنچ کے سامنے تذکرہ کرتے ہوئے منسوی وششٹھ کے طرزِ عمل پر از خود نوٹس لینے کا مطالبہ کیا تھا، لیکن عدالت نے از خود نوٹس لینے سے انکار کر دیا تھا۔
ہائی کورٹ نے وکلا سے کہا کہ وہ تمام دستیاب دستاویزات کے ہمراہ ایک باقاعدہ عرضی داخل کریں، جس پر عدالت غور کرے گی۔ اس کے بعد 3 نومبر کو ہی ہائی کورٹ میں عرضی داخل کی گئی۔ وکلا نے عدالت کو بتایا کہ ان کے خلاف ’’اے کے-47 کا استعمال‘‘ اور ’’کالے کوٹ کے غنڈے‘‘ جیسے تبصرے کیے گئے۔