TAASIR NEWS NETWORK- SYED M HASSAN –28 MAY
نئی دہلی ،28مئی :آج انڈین پریمیئر لیگ کے 16ویں سیزن کا فائنل میچ گجرات ٹائٹنز اور چنئی سپر کنگز (جی ٹیبمقابلہ سی ایس کے) کے درمیان کھیلا جائے گا۔ دونوں ٹیمیں احمد آباد کے نریندر مودی اسٹیڈیم میں آمنے سامنے ہوں گی جس کے لیے شائقین کافی پرجوش ہیں۔ ادھر ممبئی انڈینز کی جانب سے سوشل میڈیا پر ایک جذباتی ویڈیو منظر عام پر آئی ہے جس میں تمام کھلاڑی وطن واپسی کی تیاری کرتے ہوئے افسردہ نظر آئے۔
بتا دیںکہ پانچ بار کی آئی پی ایل فاتح ممبئی انڈینس کو دوسرے کوالیفائر میچ میں گجرات ٹائٹنز کے ہاتھوں عبرتناک شکست کا سامنا کرنا پڑا تھا۔ اس جیت کے ساتھ، جی ٹی نے مسلسل دوسری بار ٹورنامنٹ کے فائنل میں داخلہ لیا۔ ہفتے کے روز، فرنچائز نے اپنے آفیشل انسٹاگرام اکاؤنٹ پر ڈریسنگ روم کی ایک ویڈیو شیئر کی جس میں تمام کھلاڑی ٹورنامنٹ سے باہر ہونے پر افسردہ نظر آئے۔ اسی دوران تمام کھلاڑی ایک دوسرے سے گلے ملتے ہوئے جذباتی ہو گئے۔ ٹورنامنٹ کی یاد دہانی کے طور پر کھلاڑیوں نے ایک دوسرے کے بلے اور جرسیوں پر دستخط بھی کئے۔
اس سیزن میں ممبئی انڈینز کی کارکردگی کی بات کریں تو اس نے لیگ مرحلے میں 14 میں سے آٹھ میچ جیتے اور 16 پوائنٹس کے ساتھ پلے آف میں جگہ بنائی۔ پھر پلے آف راؤنڈ میں، ٹیم نے ایلیمینیٹر میں لکھنؤ سپر جائنٹس کو جامع طور پر شکست دی، لیکن کوالیفائر 2 میں گجرات ٹائٹنز سے 62 رن سے ہار گئی۔ اس سیزن میں ٹیم کے بلے بازوں بالخصوص سوریہ کمار یادو، نہال وڈھیرا، کیمرون گرین اور ٹم ڈیوڈ نے کئی بار ٹیم کو مشکلات سے نکالا ہے۔
اس کے بعد آکاش مدھوال نے پچھلے کچھ میچوں میں گیند بازی میں کمال کیا۔ پیوش چاولہ نے اسپن کی باگ ڈور سنبھالی اور 22 وکٹیں حاصل کیں۔ ٹیم 6 سال بعد (2017 کے بعد) پلے آف میں ہار گئی۔ آخری بار ٹیم یہاں 2017 میں رائزنگ پونے سپر جائنٹس کے خلاف ہاری تھی۔
