تاثیر،۱۰ جنوری۲۰۲۴:- ایس -ایم- حسن
نئی دہلی، 10 جنوری: تجربہ کار بلے باز اسٹیو اسمتھ آئندہ ماہ ویسٹ انڈیز کے خلاف ون ڈے سیریز میں آسٹریلیا کی کپتانی کریں گے جب کہ فاسٹ بولر لانس مورس کو اس فارمیٹ میں پہلی بار اسکواڈ میں شامل کیا گیا ہے اور مارکس اسٹوئنس کو ڈراپ کردیا گیا ہے۔
آسٹریلیا اور ویسٹ انڈیز کے درمیان تین ون ڈے میچوں کی سیریز کا آغاز 2 فروری سے ہوگا جب کہ بقیہ دو میچز 4 اور 6 فروری کو کھیلے جائیں گے۔
نومبر میں ٹیم کو ورلڈ کپ خطاب دلانے والے پیٹ کمنز کو جنوبی افریقہ میں ٹیم کی کپتانی کرنے والے مچل مارش کے ساتھ آرام دیا گیا ہے۔ مچل اسٹارک اور جوش ہیزل ووڈ کو بھی میلبورن، سڈنی اور کینبرا میں ہونے والے 50 اوور کے تین میچوں سے بریک دیا گیا ہے۔ ڈیوڈ وارنر نے گزشتہ ہفتے فارمیٹ سے ریٹائرمنٹ کا اعلان کیا تھا، حالانکہ انہوں نے 2025 کی چیمپئنز ٹرافی میں کھیلنے کے دروازے کھلے رکھے ہیں۔
ویسٹرن آسٹریلیا اور پرتھ اسکارچرز کے تیز گیندباز جھائے رچرڈسن کو 2022 میں سری لنکا کے دورے کے بعد پہلی بار واپس بلایا گیا ہے جبکہ نیتھن ایلس کے ساتھ ایرون ہارڈی اور میٹ شارٹ بھی شامل ہیں۔
ہارڈی نے اپنا ون ڈے ڈیبیو گزشتہ ستمبر میں جنوبی افریقہ کے خلاف کیا تھا اور شارٹ نے ورلڈ کپ سے قبل ہندوستان کے خلاف سیریز میں ڈیبیو کیا تھا۔ دونوں نے اس سیزن میں بی بی ایل میں متاثر کرنے کا سلسلہ جاری رکھا ہے۔
حالانکہ اسٹوئنس کے لیے کوئی جگہ نہیں ہے جو ہندوستان میں ورلڈ کپ جیتنے والے گروپ کا حصہ تھے، ٹورنامنٹ کے اختتام تک انہوں نے اس ٹیم میں بھی اپنی جگہ کھودی تھی۔
قومی سلیکٹر جارج بیلی نے کہا، ’’چیمپیئنز ٹرافی صرف 12 ماہ دور ہے اور ایرون ہارڈی، میٹ شارٹ، جھائے رچرڈسن اور نیتھن ایلس جیسے کھلاڑیوں کے لیے آنے والے مواقع بحیثیت ٹیم ہماری جاری سدھار اور ون ڈے کرکٹ میں ان کے ذاتی تجربات کو آگے بڑھانے میں قیمتی ثابت ہوں گے۔‘‘
ویسٹ انڈیز کے خلاف سیریز ستمبر میں انگلینڈ کے دورے تک آسٹریلیا کی آخری ون ڈے سیریز ہے۔
ویسٹ انڈیز کے خلاف آسٹریلیا کی ون ڈے ٹیم درج ذیل ہے:
اسٹیو اسمتھ (کپتان)، سیئن ایبٹ، ناتھن ایلس، کیمرون گرین، آرون ہارڈی، ٹریوس ہیڈ، جوش انگلس، مارنس لابوشین، گلین میکسویل، لانس مورس، جھائے رچرڈسن، میٹ شارٹ، ایڈم زمپا۔