تاثیر،۱۴ اپریل ۲۰۲۴:- ایس -ایم- حسن
مظفر نگر، 14 اپریل: بہوجن سماج پارٹی کی قومی صدر مایاوتی نے کہا کہ اگر بہوجن سماج پارٹی (بی ایس پی) کی حکومت بنتی ہے تو مغربی اتر پردیش کو الگ ریاست بنانے کے لیے کام کیا جائے گا۔
گورنمنٹ انٹر کالج گراؤنڈ میں جلسہ عام سے خطاب کرنے سے پہلے مایاوتی نے بابا صاحب ڈاکٹر بھیم راؤ امبیڈکر کی تصویر پر پھول چڑھائے۔ اس کے بعد انہوں نے کہا کہ ان کی حکومت کے دوران مظفر نگر میں کوئی فساد نہیں ہوا۔ پچھلی ایس پی حکومت کے دوران مظفر نگر میں اتنا خوف و ہراس پھیل گیا تھا کہ مسلم کمیونٹی کے نمائندے الیکشن لڑنے کو تیار نہیں تھے۔ اس وجہ سے انتہائی پسماندہ طبقے سے امیدوار کو میدان میں اتارا گیا۔مایاوتی نے کہا کہ ہماری پارٹی کم بولنے پر یقین رکھتی ہے۔ اس لیے منشور جاری نہیں کرتی۔ اتر پردیش میں چار بار بی ایس پی کی حکومت کے دوران پارٹی نے کوئی بھی منشور جاری نہ کرکے تاریخی کام کیا ہے۔ اگر بی ایس پی کی حکومت بنتی ہے تو وہ زمین پر اترے گی اور ٹھوس کام کرے گی۔ بیروزگاری اور مہنگائی کو دور کرنے کی بھی بات ہوئی ہے۔ مذہب کے نام پر امت مسلمہ پر ہونے والا ظلم بھی بند ہو گا۔اس کے علاوہ سہارنپور میں جلسہ عام سے خطاب کرتے ہوئے مایاوتی نے کہا کہ ہماری پارٹی کا کانگریس، بی جے پی یا کسی مخالف سیاسی پارٹی کے ساتھ اتحاد نہیں ہے۔ بلکہ اپنے ایماندار کارکنوں کے بل بوتے پر تنہا الیکشن لڑ رہی ہے۔ بی ایس پی نے ٹکٹوں میں تمام برادریوں کے لوگوں کو حصہ دیا ہے۔انہوں نے کہا کہ بی جے پی حکومت کے دس سال کے دوران صرف سرمایہ داروں کو فائدہ ہوا ہے۔ اب بی جے پی کی بیان بازی کام نہیں کرے گی۔ بی جے پی کی ذہنیت بھی تنگ ہے۔