تاثیر،۱۴ اپریل ۲۰۲۴:- ایس -ایم- حسن
خیرگڑھ/رائے پور، 14 اپریل: مرکزی وزیر داخلہ امت شاہ نے چھتیس گڑھ کے راج ناندگاؤں لوک سبھا حلقہ کے خیر گڑھ میں ایک عوامی اجلاس میں مرکزی حکومت کی کامیابیوں اور پالیسیوں کے بارے میں بات کی۔ وہ یہاں بی جے پی امیدوار سنتوش پانڈے کی حمایت میں ایک میٹنگ سے خطاب کررہے تھے۔ شاہ نے کانگریس پر کئی تیز حملے کئے۔ انہوں نے ریاست کے لوگوں کو یقین دلایا کہ اگر نریندر مودی تیسری بار وزیر اعظم بنتے ہیں تو چھتیس گڑھ کو نکسل فری ریاست بنائیں گے۔مرکزی وزیر شاہ نے میٹنگ میں اپنی تقریر کا آغاز ماں بمبلیشوری کو خراج عقیدت پیش کرتے ہوئے کیا۔ انہوں نے کہا کہ آج امبیڈکر جینتی ہے، آج پورا ملک آئین کے خالق کو یاد کر رہا ہے۔ شاہ نے کہا کہ جس طرح اسمبلی انتخابات میں بی جے پی کو واضح اکثریت دی گئی تھی، اسی طرح اس الیکشن میں بھوپیش بگھیل کو بڑے فرق سے ہرا کر گھر بھیج دیں۔ شاہ نے کہا کہ کانگریس کے قومی صدر ملکارجن کھرگے کہتے ہیں کہ مودی آئین بدلیں گے۔ ان کے پیروکاروں کا کہنا ہے کہ اگر مودی دوبارہ آئے تو ریزرویشن ختم ہو جائے گا۔ میں بتانا چاہتا ہوں کہ یہ لوگ جھوٹ کا کاروبار کرتے ہیں۔ چاہے کچھ بھی ہو جائے، بی جے پی نہ تو ریزرویشن ختم کرے گی اور نہ ہی ہونے دیگی۔شاہ نے کہا کہ سنتوش پانڈے کو دیا گیا ووٹ نریندر مودی کو براہ راست وزیر اعظم بنائے گا۔ اگر آپ مودی کو تیسری بار وزیر اعظم بناتے ہیں تو ہم چھتیس گڑھ کو نکسل فری ریاست بنانے کا کام تین سالوں میں پورا کریں گے۔ نریندر مودی نے کسانوں کی فلاح و بہبود کے لیے بہت سے کام کیے ہیں۔