تاثیر۱۹ جولائی ۲۰۲۴:- ایس -ایم- حسن
سرینگر، 19 جولائی :پانی کی قلت کے خلاف جمعہ کو سینکڑوں لوگوں نے چنبل پٹن میں سری نگر-بارہمولہ ہائی وے کو بلاک کرکے احتجاج کیا۔ احتجاج بعد میں پرتشدد ہو گیا، مظاہرین نے پتھراؤ کیا۔ جواب میں پولیس نے لاٹھی چارج اور آنسو گیس کی شیلنگ کی۔ عینی شاہدین نے بتایا کہ گزشتہ کئی دنوں سے گاؤں میں پانی کی قلت کے باعث چنبل پٹن کے لوگوں نے علی الصبح سے ہی شاہراہ کو بند کر رکھا تھا۔ انہوں نے گاؤں میں پانی کی فراہمی کا مطالبہ کرتے ہوئے سری نگر-بارہمولہ ہائی وے کو کئی گھنٹوں تک بند رکھا۔ صلاح مشورے کے بعد پولیس نے معاملے کو حل کرنے کی کوشش کی، لیکن احتجاج پرتشدد ہو گیا، مظاہرین نے پتھراؤ کا سہارا لیا۔ پتھراؤ سے کء ڈرائیوروں سمیت کئی افراد زخمی ہو گئے۔ بعد ازاں پولیس نے لاٹھی چارج اور آنسو گیس کی شیلنگ کرکے مظاہرین کو منتشر کردیا۔ کئی گاڑیوں کو بھی کافی نقصان پہنچا۔ ایک سینئر پولیس افسر نے بتایا کہ کچھ لوگوں نے پانی کی قلت کے خلاف احتجاج کیا تھا، لیکن یہ پرتشدد ہو گیا، جس کے نتیجے میں کئی مسافر زخمی ہو گئے۔انہوں نے کہا کہ ہم نے اس سلسلے میں مقدمہ درج کر لیا ہے۔ وہیں پیپلز کانفرنس کے صدر سجاد لون نے ایک پوسٹ میں کہا ہے کہ یہ کیا ہو رہا ہے۔ پانی کی قلت کے خلاف لوگ محض اپنا احتجاج درج کروا رہے ہیں۔ اور جے کے پولیس کا کیا ردعمل ہے؟ ایسا لگتا ہے جیسے وہ کسی تصادم کی جگہ پر ہوں۔ لون نے کہا کہ کیا آپ براہِ کرم لوگوں کی بات سننا شروع کر سکتے ہیں اور انسانوں کے ساتھ انسانوں جیسا سلوک کرنے کی اعلیٰ ترین قربانی پیش کر سکتے ہیں۔ دریں اثناء بی جے پی کشمیر نے کہا کہ پارٹی کے میڈیا انچارج کشمیر ایڈووکیٹ ساجد یوسف شاہ، اور سوشل میڈیا انچارج ساحل بشیر بھٹ پر میرگنڈ پٹن میں نامعلوم ہجوم نے حملہ کیا۔ ترجمان نے کہا کہ پی ایس او بھی شدید زخمی ہوئے۔