تاثیر ۱۰ ستمبر ۲۰۲۴:- ایس -ایم- حسن
اورنگ آباد ، 10 ستمبر:مراٹھواڑہ میں یکم اور 3 ستمبر کے درمیان شدید بارش نے خریف کی فصلوں اور باغات کو بڑے پیمانے پر نقصان پہنچایا ہے۔ اس شدید بارش سے 18 لاکھ ہیکٹر سے زیادہ کا رقبہ متاثر ہوا ہے جس میں 22 لاکھ 48 ہزار 445 کسانوں کی فصلیں متاثر ہوئی ہیں۔ متاثرہ علاقوں میں سے 17 لاکھ ہیکٹر پر قابل کاشت فصلیں اور 27 ہزار ہیکٹر باغات ہیں۔ انتظامیہ نے فوری طور پر نقصانات کا تخمینہ لگانے کا کام شروع کر دیا ہے۔ فی الحال مراٹھواڑہ میں 7 لاکھ 20 ہزار ہیکٹر رقبہ کا پنچنامہ مکمل ہو چکا ہے، جو کل نقصان کے رقبے کا 39 فیصد ہے۔ باقی 11 لاکھ ہیکٹر کا پنچنامہ ابھی باقی ہے۔ کسان اب حکومت کی طرف سے مدد کے منتظر ہیں، کیونکہ معاوضے کا عمل پنچنامہ مکمل ہونے کے بعد ہی شروع ہوگا۔ اس نقصان کی وجہ سے کسانوں کا مالی حساب بگڑ گیا ہے اور وہ حکومت سے فوری مالی امداد کی توقع رکھتے ہیں۔ کسانوں کے صبر کا پیمانہ لبریز ہو رہا ہے کیونکہ وہ پنچنامہ مکمل ہونے اور اس کے بعد امداد ملنے کا انتظار کر رہے ہیں۔