تاثیر ۲۳ ستمبر ۲۰۲۴:- ایس -ایم- حسن
جموں, 23 ستمبر:: نیشنل کانفرنس (این سی) کے صدر فاروق عبداللہ نے پیر کے روز آرٹیکل 370 کی تاریخی اہمیت کو اجاگر کرتے ہوئے کہا کہ جموں و کشمیر کی خصوصی حیثیت ختم ہونے کے بعد، یونین ٹیریٹری کے لوگوں نے اپنی ملازمتیں کھو دی ہیں۔سابق وزیر اعلیٰ نے حکومت پر آرٹیکل 370 کے خاتمے پر تنقید کرتے ہوئے کہا کہ اس اقدام کے بعد یہاں کے لوگوں کی نوکریاں چھین کر دیگر ریاستوں کے لوگوں کو دی جا رہی ہیں۔فاروق عبداللہ کا یہ بیان جموں و کشمیر میں دوسرے مرحلے کے اسمبلی انتخابات سے چند روز قبل سامنے آیا ہے، جو 25 ستمبر کو ہونے والے ہیں۔راجوری ضلع میں عوامی اجتماع سے خطاب کرتے ہوئے انہوں نے کہا کہ مہاراجہ ہری سنگھ نے 1927 میں ایک قانون بنایا تھا۔ اس وقت نہ پاکستان تھا نہ ہندوستان۔ مہاراجہ کو یہ فکر تھی کہ اگر ریاست پر قبضہ ہو گیا اور امیر لوگ آ کر ان کی زمینوں پر قبضہ کر لیں تو ہمارے لوگ کہاں جائیں گے؟ وہی قانون آرٹیکل 370 میں تبدیل ہو گیا۔انہوں نے مزید کہا کہ آرٹیکل 370 کے خاتمے کے بعد ہماری زمینیں اور ملازمتیں ہم سے چھینی جا رہی ہیں۔ دیگر ریاستوں کے لوگوں کو یہاں ملازمتیں دی جا رہی ہیں۔ یہ آپ کی زمین ہے اور آپ کے بچوں کو یہ ملازمتیں ملنی چاہئیں۔ ہم وعدہ کرتے ہیں کہ ہم 1 لاکھ نوجوانوں کو ملازمتیں فراہم کریں گے۔