تاثیر ۴ ستمبر ۲۰۲۴:- ایس -ایم- حسن
بہرائچ،04ستمبر:بھاگو، بھاگو، بھیڑیا آگیا۔۔۔ اتر پردیش کے بہرائچ میں پچھلے دو ماہ سے ایسا ہی منظر دیکھنے کو مل رہا ہے۔ ان دنوں آدم خوروں کے خوف سے کیچھر کے 40 دیہاتوں میں کہرام مچا ہوا ہے۔ بھیڑیے اب تک 9 بچوں سمیت 10 افراد کو ہلاک کر چکے ہیں۔ 37 سے زائد افراد بری طرح زخمی ہوئے ہیں۔ آدم خور خون کے اتنے بھوکے ہیں کہ ان کی بھوک نہیں مٹ رہی۔ دیہاتیوں میں خوف و ہراس اس حد تک پھیل گیا ہے کہ وہ اپنے گھروں میں بھی محفوظ محسوس نہیں کرتے۔ یہ آدم خور ہر روز اپنے حملوں کا دائرہ بڑھا رہے ہیں۔ ہردی اور خیری گھاٹ کے بعد اب یہ بھیڑیے رامگاؤں تک پہنچ گئے ہیں۔منگل کو 5 سالہ افسانہ بھیڑیے کے کاٹنے سے بال بال بچ گئی۔ بھیڑیے نے اس کی گردن پر حملہ کیا، کسی طرح اس کی جان بچ گئی۔ لیکن پیر کو ڈھائی سالہ انجلی کو بچایا نہیں جا سکا۔ وہ اپنی ماں کے پاس سو رہی تھی۔ پھر بھیڑیا گھر میں داخل ہوا اور لڑکی کو جبڑے میں دبا کر لے گیا۔ کوٹیا کے بارہ بیگھہ کی کملا ہو یا پپی موہن کی سمن دیوی، یہ سبھی لوگ بھیڑیوں کے حملے کا شکار ہو چکے ہیں۔