تاثیر 24 دسمبر ۲۰۲۴:- ایس -ایم- حسن
پٹنہ، 24 دسمبر: بی پی ایس سی امتحان منسوخ کرنے کا مطالبہ کرتے ہوئے پٹنہ کے گردنی باغ میں امیدوار مسلسل دھرنے پر بیٹھے ہیں۔ اس سے پہلے اپوزیشن لیڈر تیجسوی یادو نے ہفتہ کی رات بی پی ایس سی امیدواروں سے ملاقات کی اور اپنی حمایت دی۔ جب کہ اب پورنیہ سے آزاد رکن اسمبلی پپو یادو بھی کھل کر ان کی حمایت میں آ گئے ہیں۔ وہ اتوار کی نصف شب سے احتجاج مقام پر بیٹھے ہیں۔ انہوں نے اعلان کیا کہ امتحانات منسوخ ہونے تک ان کی لڑائی جاری رہے گی۔
پپو یادو نے رات گردنی باغ میں بی پی ایس سی امیدواروں سے ملاقات کی۔ وہ خود رات 12 بجے سے ہڑتال پر بیٹھے ہیں۔ انہوں نے بہار پبلک سروس کمیشن سے امتحان منسوخ کرنے اور دوبارہ امتحان کرانے کا مطالبہ کیا ہے۔ پورنیہ کے ایم پی نے انتباہی لہجے میں کہا کہ اگر مطالبہ نہیں مانا گیا تو تحریک پرتشدد ہو جائے گی۔