تاثیر 27 فروری ۲۰۲۵:- ایس -ایم- حسن
شملہ، 27 فروری: ہماچل پردیش میں گزشتہ تین دنوں سے مسلسل برف باری سے معمولات زندگی بری طرح متاثر ہوئے ہیں۔ لاہول سپتی، کنور اور چمبہ اضلاع میں شدید برف باری کی وجہ سے سڑکوں پر ٹریفک ٹھپ ہو کر رہ گئی ہے۔ ان اضلاع میں 200 سے زیادہ سڑکیں بند کر دی گئی ہیں جس سے مقامی لوگوں کو شدید پریشانی کا سامنا ہے۔
لاہول سپتی ضلع میں صورتحال سب سے زیادہ خراب ہے۔ اب تک یہاں ڈیڑھ سے تین فٹ برف پڑ چکی ہے جس کی وجہ سے کئی دیہات کا رابطہ منقطع ہے۔ لاہول سپتی انتظامیہ نے شدید برف باری کی وجہ سے آج یعنی 27 فروری کو ضلع کے کیلونگ، ادے پور اور کازا سب ڈویڑنوں میں تمام تعلیمی اداروں کو بند رکھنے کا حکم دیا ہے۔ ادھر محکمہ موسمیات نے آئندہ 48 گھنٹوں کے لیے اورنج الرٹ جاری کرتے ہوئے شدید برف باری اور بارش کی پیش گوئی کی ہے۔
لاہول وادی دوسرے دن بھی منقطع، اٹل ٹنل بند
وادی لاہول میں شدید برف باری کی وجہ سے قومی شاہراہ 3 بند کر دی گئی ہے جس کی وجہ سے وادی کا ملک کے دیگر حصوں سے سڑک رابطہ مکمل طور پر منقطع ہو گیا ہے۔ اٹل ٹنل روہتانگ کو بھی شدید برف باری کی وجہ سے بند کر دیا گیا ہے۔ اس کی وجہ سے لاہول اور منالی کے درمیان ٹریفک میں خلل پڑا ہے۔
لاہول سپتی انتظامیہ نے لوگوں سے اپیل کی ہے کہ وہ بغیر کسی ضروری کام کے اپنے گھروں سے نہ نکلیں اور محفوظ مقامات پر رہیں۔ انتظامیہ کی جانب سے سڑک کی بحالی کے لیے مسلسل کوششیں جاری ہیں۔
کنور اور چمبہ میں بھی برف باری، شملہ اور میدانی علاقوں میں بارش جاری ہے۔
ریاست کے دیگر اونچائی والے علاقوں میں بھی برف باری جاری ہے۔ کنور ضلع کی اونچی چوٹیوں پر وقفے وقفے سے برف باری ہو رہی ہے جبکہ زیریں علاقوں میں بارش سے سردی میں اضافہ ہو گیا ہے۔ چمبا ضلع میں بھی برف باری کی وجہ سے 30 سڑکیں بند ہو گئی ہیں۔ کنور میں بھی ٹریفک متاثر ہوئی ہے۔