تاثیر 23 مارچ ۲۰۲۵:- ایس -ایم- حسن
سریندر نگر، 23 مارچ : گجرات کے سریندر نگر ضلع کی دھرنگدھرا تحصیل کے نوال گڑھ گاؤں میں پیٹسن پیپر مل میں ہفتہ کو لگی آگ دوسرے دن اتوار کی شام تک بھی نہیں بجی تھی۔ احمد آباد، راجکوٹ، سریندر نگر کی فائر بریگیڈ ٹیموں اور فوج کی مدد سے آگ بجھانے کی کوششیں 22 گھنٹے سے زیادہ وقت سے جاری ہیں۔ بتایا گیا کہ اتوار کی صبح تک 85 فیصد آگ پر قابو پا لیا گیا تھا لیکن شام تک آگ مکمل طور پر نہیں بجھی تھی۔ آگ کی ہولناکی اور شدید گرمی کے درمیان آگ بجھانے کے لیے 50 ہزار لیٹر سے زائد پانی استعمال کیا گیا ہے۔
سریندر نگر کے دھرنگدھرا کے نوال گڑھ گاؤں میں 22 مارچ کو شام تقریباً 4:15 بجے ایک پیپر مل میں آگ لگ گئی۔ فیکٹری میں کاغذ سے متعلق خام مال کی موجودگی کے باعث آگ نے کچھ ہی دیر میں خوفناک شکل اختیار کر لی۔ آگ کی ہولناکی دیکھ کر ایس ڈی ایم موقع پر پہنچ گئے اور بھارتی فوج سے مدد طلب کی۔ اس کے بعد 80 بھارتی فوجیوں کا دستہ موقع پر پہنچ گیا ہے۔ فیکٹری میں پھنسے کچھ لوگوں کو بچا لیا گیا۔ اس کے علاوہ تین اضلاع کی فائر بریگیڈ کی ٹیمیں مسلسل پانی کا چھڑکاؤ کرکے آگ پر قابو پانے کی کوشش کرتی رہیں۔ فائر بریگیڈ کے تقریباً 75 سے 80 اہلکار موقع پر موجود تھے اور آگ بجھانے میں مصروف تھے۔