تاثیر 26 اپریل ۲۰۲۵:- ایس -ایم- حسن
ٹیکسٹائل اور جوٹ صنعت کے فروغ کیلئے حکومت کے عزم کا اعادہ
کولکتہ، 26 اپریل (محمد نعیم) — مرکزی وزیر برائے ٹیکسٹائل، گری راج سنگھ نے آج کولکتہ کے جوٹ ہاؤس میں نئے تعمیر شدہ جے بی اے ہال کا افتتاح کیا۔ اس موقع پر منعقدہ تقریب میں مغربی بنگال کے سرکاری حکام، صنعت کاروں، اور ٹیکسٹائل و جوٹ شعبے سے وابستہ تاجروں کی بڑی تعداد نے شرکت کی۔
تقریب سے خطاب کرتے ہوئے وزیر موصوف نے بھارت میں ٹیکسٹائل اور جوٹ سیکٹر کو عالمی سطح پر بلند کرنے کے حکومت کے عزم کو اجاگر کیا۔ انہوں نے کہا کہ ایسے اقدامات نہ صرف صنعت میں ترقی اور جدت کو فروغ دیتے ہیں بلکہ روزگار کے مواقع پیدا کرنے اور زرمبادلہ کمانے میں بھی اہم کردار ادا کرتے ہیں۔
گری راج سنگھ نے جوٹ اور ٹیکسٹائل صنعت کے موجودہ چیلنجز پر روشنی ڈالتے ہوئے ترقی کی حکمت عملیوں پر تبادلہ خیال کیا۔ انہوں نے زور دیا کہ جوٹ پیداوار میں ویلیو ایڈیشن بڑھانے، جدید ٹیکنالوجی کو اپنانے اور پائیدار طریقے اختیار کرنے کی ضرورت ہے تاکہ عالمی منڈیوں کی بڑھتی ہوئی ضروریات کو پورا کیا جا سکے۔
وزیر نے صنعت کاروں پر زور دیا کہ وہ حکومت کے ساتھ مل کر کام کریں تاکہ ملک کے ٹیکسٹائل اور جوٹ شعبے کو نئی بلندیوں تک پہنچایا جا سکے۔