تاثیر 20 مئی ۲۰۲۵:- ایس -ایم- حسن
دہرادون، 20 مئی: ہمت، عزم اور ان گنت چیلنجوں پر قابو پانے کی شاندار مثال پیش کرتے ہوئے اتراکھنڈ کے نیشنل کیڈٹ کور (این سی سی) کے تین نوجوان کیڈٹس نے دنیا کی بلند ترین چوٹی ماؤنٹ ایورسٹ پر ترنگا لہرا کر ملک اور ریاست کا نام روشن کیا ہے۔یہ تاریخی کامیابی 18 مئی کو حاصل ہوئی جس سے ثابت ہوتا ہے کہ جب خوابوں پر یقین اور محنت ہو تو کوئی بھی مقصد ناممکن نہیں ہوتا۔ ان بہادر نوجوان کوہ پیما کیڈٹس میں وریندر سمنت، 29 اتراکھنڈ بٹالین نیشنل کیڈٹ کور، دہرادون، مکل بنگوال، 4 اتراکھنڈ بٹالین این سی سی، پوڑی، کیڈٹ سچن کمار، 3 اتراکھنڈ بٹالین این سی سی، اترکاشی شامل ہیں۔ دنیا کی بلند ترین پہاڑی چوٹی پر چڑھ کر انہوں نے نہ صرف اپنی ذاتی ہمت کا امتحان لیا بلکہ یہ پیغام بھی دیا کہ اگر ہندوستان کے نوجوان پرعزم ہیں تو کوئی بھی چیلنج ان کے راستے میں نہیں آ سکتا۔کیڈٹ وریندر سمنت نے کہا کہ یہ ہماری جیت نہیں ہے، یہ ہر اس نوجوان کی جیت ہے جو خواب دیکھتا ہے۔ ہم نے سخت چیلنجز کا سامنا کیا لیکن ہر قدم پر ہمیں یقین تھا – خود پر، اپنی ٹیم پر، اور اس خواب کو حاصل کرنے میں۔