تاثیر 10 جون ۲۰۲۵:- ایس -ایم- حسن
شمالی دیناج پور، 09 جون: ضلع کے چوپڑا تھانہ کے تحت لکشمی پور علاقہ میں ایک نوجوان نے اپنی ہونے والی بیوی کو’قتل‘ کرنے کے بعد پولیس اسٹیشن میں خودسپردگی کی۔ پولیس نے لاش چائے کے باغ سے برآمد کر لی ہے۔ پیر کو پولیس نے بتایا کہ ہلاک ہونے والی لڑکی کا نام نرگس پروین (20) ہے۔نرگس کے اہل خانہ کے مطابق سلطان احمد کی شادی ڈیڑھ ماہ قبل لکشمی پور کے علاقے کی رہائشی نرگس پروین سے طے ہوئی تھی۔ ان کی شادی 19 جون کو ہونی تھی۔ لڑکے کے گھر والوں نے لڑکی کے گھر والوں سے جہیز کے طور پر سات لاکھ کا مطالبہ کیا تھا جسے قبول کر لیا گیا۔ یہی نہیں لڑکی کے اہل خانہ نے کہا تھا کہ سلطان کے اہل خانہ کو ہفتے کے روز تین لاکھ ایڈوانس دیے گئے تھے۔ لڑکی کو ہفتہ کی رات آدھار اور ووٹر آئی ڈی کے ساتھ گھر سے نکلنے کو کہا گیا۔ وعدے کے مطابق لڑکی گھر سے چلی گئی لیکن واپس نہیں آئی۔اتوار کو جب نرگس نہیں ملی تو اس کے اہل خانہ نے چوپڑا پولیس اسٹیشن میں شکایت درج کرائی۔ سلطان آدھی رات کو تھانے گیا اور بتایا کہ اس نے اپنی ہونے والی بیوی کو’قتل‘ کر دیا ہے اور لاش کو سرحد کے قریب چوٹیاکھور گرام پنچایت علاقے میں چائے کے باغ میں دفن کر دیا ہے۔ پولیس فوراً وہاں پہنچ گئی۔ لاش چائے کے باغ سے برآمد ہوئی۔ پولیس نے لاش کو برآمد کرنے کے بعد پوسٹ مارٹم کے لیے بھیج دیا۔ پولیس ملزم سے پوچھ گچھ کر رہی ہے۔مقتول کے اہل خانہ نے الزام لگایا ہے کہ اس واقعے میں سلطان کے والد، بھائی اور دیگر ملوث ہیں۔ متوفی لڑکی کے اہل خانہ نے ان کی گرفتاری کا مطالبہ کرتے ہوئے لکشمی پور علاقہ میں سڑک پر ٹائر جلا کر احتجاج کیا۔ بعد ازاں پولیس نے آکر حالات کو قابو میں کیا۔