تاثیر 5 ستمبر ۲۰۲۵:- ایس -ایم- حسن
کولکاتہ، 5 ستمبر: مغربی بنگال پولیس کی اسپیشل ٹاسک فورس (ایس ٹی ایف) نے جمعرات کی رات شہر کی ایک مشہور بندوق کی دکان پر چھاپہ مارا اور تین مالکان کو گرفتار کیا۔ اس دوران دکان سے کل 41 غیر قانونی بندوقیں برآمد ہوئیں۔ ان میں ڈبل بیرل اور سنگل بیرل دونوں بندوقیں شامل ہیں۔
یہ کارروائی کولکاتہ کے بی بی ڈی باغ میں واقع ‘نرسنگ چندر اینڈ دا’ نامی لائسنس یافتہ بندوق کی دکان پر کی گئی۔ ایس ٹی ایف کی جانچ میں یہ بات سامنے آئی کہ دکان کے ذریعے غیر قانونی طور پر بندوقیں خریدی اور فروخت کی جا رہی تھیں۔ دکان سے پکڑی گئی بندوقوں کا کوئی سرکاری ریکارڈ موجود نہیں تھا۔
ایس ٹی ایف نے کہا کہ یہ معاملہ پہلے ہی رہدہ پولیس اسٹیشن میں درج ایک کیس سے متعلق ہے جس کی تحقیقات بعد میں ایس ٹی ایف کو سونپ دی گئی تھی۔ تحقیقات سے معلوم ہوا کہ کچھ لوگ دکان سے غیر قانونی طور پر بندوقیں خرید کر مہنگے داموں فروخت کرتے تھے۔ اس سلسلے میں جمعرات کی شب کیے گئے چھاپے میں بڑی تعداد میں اسلحہ برآمد کیا گیا۔ گرفتار ملزمان کی شناخت گریش پارک ساکن سبیر داس، ابھیر داس اور شبھرتا داس کے طور پر کی گئی ہے۔ تینوں دکان کے شراکت دار اور مالک بتائے جاتے ہیں۔