تاثیر 28 اکتوبر ۲۰۲۵:- ایس -ایم- حسن
پٹنہ، 28 اکتوبر: نائب وزیر اعلیٰ سمراٹ چودھری نے منگل کے روز تیجسوی یادو پر تنقید کرتے ہوئے کہا کہ بہار نے رفتار پکڑلی ہے اور تیزی سے ترقی کی طرف بڑھ رہا ہے۔ 2 کروڑ 70 لاکھ نوکریوں کا وعدہ جھوٹا، اپوزیشن بتائے کہاں سے لائیں گے 12 لاکھ کروڑ روپے۔ لالو پرساد یادو نے بہار کو 15 سال تک بدعنوانی اور گھوٹالوں میں الجھائے رکھا۔ این ڈی اے حکومت نے 12 لاکھ کو ملازمتیں اور 38 لاکھ لوگوں کو روزگار فراہم کئے۔
بہار کے نائب وزیر اعلیٰ سمراٹ چودھری نے عظیم اتحاد پر سخت حملہ کرتے ہوئے کہا کہ جن کے والدین وزیر اعلیٰ رہتے ہوئے بہار میں 100,000 سرکاری نوکریاں بھی فراہم کرنے میں ناکام رہے، وہ اب 2 کروڑ 27 لاکھ لوگوں کو سرکاری ملازمتیں فراہم کرنے کا خواب دیکھ رہے ہیں۔ ایسے بڑ بولے پن کے لئے بہار میں ایک کہاوت مشہور ہے ’’باپ نہ مارے میڈھکی، بیٹا تیر انداز‘‘۔
نائب وزیر اعلیٰ چودھری نے بتایا کہ بہار کا کل بجٹ 317,000 کروڑ روپے ہے، جس میں سے 85,000 کروڑ روپے 22 لاکھ سرکاری ملازمین کی تنخواہ پر خرچ ہوتے ہیں۔ اگر 2 کروڑ 27 لاکھ لوگوں کو سرکاری نوکریاں دی جائیں تو تنخواہوں پر تقریباً 12 لاکھ کروڑ روپے خرچ ہوں گے جو کہ بہار کے موجودہ بجٹ سے چار گنا زیادہ ہے۔ یہ دعویٰ مکمل طور پر ناقابل عمل اور عوام گمراہ کن ہے۔
انہوں نے کہا کہ عظیم اتحاد کے لیڈر بہار کے عوام کو گمراہ کرنے کی کوشش کر رہے ہیں، لیکن عوام کو مزید بے وقوف نہیں بنایا جا سکے گا۔ بہار کے عوام اس بات کو یقینی بنائیں گے کہ این ڈی اے 200 سے زیادہ سیٹیں جیت لے اور بھاری اکثریت کے ساتھ حکومت بنائے۔