تاثیر 10 اکتوبر ۲۰۲۵:- ایس -ایم- حسن
نئی دہلی، 10 اکتوبر: وزیر خارجہ ڈاکٹر ایس جے شنکر اور ان کے افغان ہم منصب امیر خان متقی نے جمعہ کو یہاں دو طرفہ بات چیت کی۔ وزیر خارجہ ڈاکٹر جے شنکر نے بات چیت کو افغانستان کے ساتھ ہندوستان کے تعلقات کی بحالی کے طور پر بیان کیا اور کابل میں اپنے مشن کو سفارت خانے کا درجہ دینے کا اعلان کیا۔ افغان وزیر خارجہ متقی 9 سے 16 اکتوبر تک بھارت کا دورہ کر رہے ہیں، آج انہوں نے وزیر خارجہ سے باضابطہ ملاقات اور بات چیت کی۔ وزیر خارجہ جے شنکر نے کہا، “قریبی پڑوسی اور لوگوں کے خیر خواہ کے طور پر، ہندوستان کی افغانستان کی ترقی اور پیشرفت میں گہری دلچسپی ہے۔ آج، میں اس بات کی تصدیق کرتا ہوں کہ ہماری دیرینہ شراکت داری، جس نے افغانستان میں متعدد ہندوستانی منصوبوں کی تکمیل دیکھی ہے، اب مزید مضبوط طریقے سے آگے بڑھے گی۔
افغان پناہ گزینوں کی صورتحال کو تشویشناک قرار دیتے ہوئے، ہندوستان نے ان کی بحالی میں مدد کے لیے اپنی آمادگی ظاہر کی۔ جے شنکر نے کہا کہ ہندوستان ان پناہ گزینوں کے لیے مکانات تعمیر کرے گا اور ضروری سامان فراہم کرے گا تاکہ وہ عزت کی زندگی گزار سکیں۔ وزیر خارجہ نے سرحد پار دہشت گردی کو ہندوستان اور افغانستان کو درپیش مشترکہ چیلنج قرار دیتے ہوئے کہا کہ اس سے دونوں ممالک کے استحکام اور ترقی کو خطرہ ہے۔ ہندوستان نے دہشت گردی کی تمام شکلوں اور مظاہر سے نمٹنے کے لیے مربوط کوششوں کی ضرورت پر زور دیا اور ہندوستان کے سیکورٹی خدشات کے بارے میں افغان فریق کی سمجھ کی تعریف کی۔