تاثیر 18 اکتوبر ۲۰۲۵:- ایس -ایم- حسن
سہسرام ( انجم ایڈوکیٹ ) صوفیاء اور اولیاء کی سرزمین سہسرام ایک بار پھر روحانی ماحول میں ڈوبی ہوئی ہے ۔ اس سال محلہ چکٹولی سہسرام میں واقع درگاہ حضرت بھولا شاہد رحمۃ اللہ علیہ کا 756 واں عرس مبارک مورخہ 16 سے 19 اکتوبر تک عظیم الشان کانفرنسوں اور اجتماعات کے ساتھ منایا جا رہا ہے، جسمیں ملک بھر سے نامور علمائے کرام اور شعرائے اسلام شرکت کر رہے ہیں ۔ درگاہ احاطہ میں علمائے کرام، طریقت علمائے کرام اور اسلامی شعراء کی آمد کا سلسلہ شروع ہو گیا ہے ۔ درگاہ مدرسہ شہیدیہ سہسرام کے مہتمم حافظ محمد سلطان احمد اور نائب مہتمم حافظ محمد مشاہد رضا حبیبی نے اطلاع دی کہ مورخہ 16 اکتوبر کو نماز عشاء کے بعد درگاہ کو غسل دیا گیا ۔ مورخہ 17 اکتوبر کو نماز فجر کے بعد قرآن خوانی کی گئی جبکہ نماز مغرب کے بعد چادر چڑھائی گئی اور شب میں لنگر تقسیم کیا گیا ۔ مورخہ 18 اکتوبر کی شب یعنی آج “فیضان بھولا شاہد کانفرنس” اور “جشن دستار حفظ القرآن” کا انعقاد کیا جائیگا، اسکے بعد ساڑھے چار بجے حضرت بھولا شاہد رحمۃ اللہ علیہ کے مزار مبارک پر عقیدت کے پھول چڑھائے جائینگے ۔ اس موقع پر مولانا عبدالحفیظ صاحب قبلہ (مبارک پور، یوپی)، مولانا ڈاکٹر جوہر میاں صاحب قبلہ (گوپال گنج بہار)، مولانا مبارک حسین چترویدی (بھبھوا بہار) اور مولانا ثاقب القادری (بنارس یوپی) کے ساتھ معروف علمائے کرام اور اسلامی شعراء اپنی تقریروں اور عارفانہ کلام سے محفل کو منور کرینگے ۔ درگاہ کمیٹی کے مہتمم حافظ محمد سلطان احمد نے بتایا کہ ضلع کلکٹر روہتاس، سب ڈویژنل آفیسر سہسرام، ٹاؤن پولس اسٹیشن آفیسر سہسرام، میونسپل کمشنر میونسپل کارپوریشن سہسرام مکمل تعاون فراہم کر رہے ہیں اور امید ہے کہ یہ تعاون 19 اکتوبر تک جاری رہیگا۔ عرس کے دوران عقیدت مندوں کی بڑی تعداد کے جمع ہونے کی توقع تھی جو ممکنات میں بدلی ہوئی ہے اس لئے درگاہ احاطہہ اور اطراف کے علاقوں میں امن و امان کو یقینی بنایا گیا ہے جس میں صفائی، پینے کے پانی، سڑک اور ڈرین کی مرمت شامل ہے ۔ انتظامیہ کی جانب سے ضلع کلکٹر، سب ڈویژنل افسر، پولس اسٹیشن انچارج و سہسرام کے میونسپل کمشنر ایک پرامن تقریب کو یقینی بنانے کی تیاریوں میں مصروف ہیں اور کمیٹی پر امید بھی ہے کہ ضلع انتظامیہ کے تعاون سے یہ عرس مبارک ہمیشہ کی طرح امن، اتحاد اور بھائی چارہ کا پیغام دیگا ۔