تاثیر 15 فروری ۲۰۲۶:- ایس -ایم- حسن
سہسرام ( انجم ایڈوکیٹ ) نیشنل میڈیکل کونسل نئی دہلی کے رہنما خطوط کی روشنی میں آج نارائن میڈیکل کالج اینڈ ہاسپٹل جموہار سہسرام میں ایک اینٹی رگنگ سیمینار کا انعقاد کیا گیا جسمیں میڈیکل کے نئے داخل ہونے والے طلباء اور ان کے سینئر بیچ کے سبھی طلباء شامل تھے ۔ سیمینار کا افتتاح گوپال نارائن سنگھ یونیورسٹی کے چانسلر گوپال نارائن سنگھ، وائس چانسلر ڈاکٹر جگدیش سنگھ، روہتاس کے سول سرجن ڈاکٹر منی رنجن، مفصل پولس اسٹیشن ڈہری کے انچارج نتیش کمار، سینئر صحافی اور ایڈوکیٹ ددن پانڈے نے مشترکہ طور پر شمع افروزی کر کیا ۔ اس موقع پر موجود طلباء سے خطاب کرتے ہوئے چانسلر نے سینئر طلباء سے اپیل کی کہ وہ ان کا احترام کریں اور ان کے ساتھ محبت سے پیش آئیں، نئے داخل ہونے والے طلباء کے ساتھ اپنے چھوٹے بھائیوں جیسا سلوک کریں تاکہ کوئی تناؤ پیدا نہ ہو ۔ وائس چانسلر ڈاکٹر جگدیش سنگھ نے کہا کہ ریگنگ قابل سزا جرم ہے اور معزز سپریم کورٹ نے اس پر سخت موقف اختیار کرتے ہوئے سزا کا بندوبست کیا ہے ۔ اس موقع پر سول سرجن روہتاس نے طلباء کو نصیحت کی کہ وہ تندہی سے اپنی تعلیم کو آگے بڑھائیں اور معاشرے و قوم میں اپنا بہتر کردار ادا کریں ۔ ڈہری مفصل پولس اسٹیشن کے انچارج نے طلباء کو مطلع کیا کہ اگر کسی بھی ریگنگ کیس میں پکڑے گئے تو انہیں قید اور تاریک مستقبل کا سامنا کرنا پڑ سکتا ہے، اس لئے انہیں ایسی کسی بھی حرکت سے باز رہنا چاہئے ۔ سینئر صحافی ددن پانڈے نے طلباء کو تفصیل سے بتایا کہ ریگنگ غیر قانونی ہے اور اس کے نتیجے میں ملک بدری، قید اور جرمانہ ہو سکتا ہے، اس لئے انہیں ریگنگ سے دور رہنا چاہئے ۔ میڈیکل کالج کے پرنسپل ڈاکٹر پونیت کمار سنگھ اور رجسٹرار ڈاکٹر کمار آلوک پرتاپ نے بھی پروگرام سے خطاب کیا ۔ اس موقع پر کنٹرولر امتحانات سدیپ کمار سنگھ، اسسٹنٹ رجسٹرار متھلیش کمار سنگھ، نارائن میڈیکل کالج اینڈ ہاسپٹل کے تمام شعبوں کے سربراہان، سینئر فیکلٹی کے لوگ و طلباء موجود تھے ۔ پروگرام کے آخر میں میڈیکل سپرنٹنڈنٹ ڈاکٹر ونود شنکر سنگھ نے اظہار تشکر کیا ۔ پروگرام کو کامیاب بنانے میں اسسٹنٹ رجسٹرار اجئے کمار سنگھ، امت کمار، پروین کمار، راکیش کمار، پشکل رنجن، رویندر کمار، پردیپ کمار وغیرہ نے نمایاں کردار ادا کیا ۔ پروگرام کی نظامت یونیورسٹی کے پبلک ریلیشن آفیسر بھوپیندر نارائن سنگھ نے کی ۔