تاثیر 21 اپریل ۲۰۲۶:- ایس -ایم- حسن
لکھنؤ،21 اپریل اتر پردیش کی راجدھانی لکھنؤ میں، بھارتیہ جنتا پارٹی (بی جے پی) نے منگل کے روز خواتین کے ریزرویشن بل (ناری شکتی وندن ایکٹ) کو لے کر اپوزیشن کانگریس اور سماج وادی پارٹی (ایس پی) کے خلاف ایک عوامی غم و غصہ خواتین مارچ کا اہتمام کرکے احتجاج کیا۔ اس موقع پر وزیر اعلی یوگی آدتیہ ناتھ، مرکزی وزیر مملکت برائے خزانہ اور ریاستی بی جے پی صدر پنکج چودھری، نائب وزیر اعلیٰ کیشو پرساد موریہ، برجیش پاٹھک، اور وزیر بے بی رانی موریہ موجود تھے۔اپنے خطاب کے دوران وزیر اعلیٰ یوگی آدتیہ ناتھ نے کہا کہ ناری شکتی وندن ایکٹ میں نئی ترمیم کی سیاست کرنے اور پارلیمنٹ میں اس کی شکست کے خلاف آج ملک گیر عوامی غم و غصہ کی ریلی نکالی جا رہی ہے۔ لکھنؤ میں کانگریس، سماج وادی پارٹی، ترنمول کانگریس (ٹی ایم سی) اور انڈیا اتحاد کے خلاف بھی احتجاج کیا گیا۔ وزیر اعلیٰ نے تمام بہنوں کو یقین دلایا کہ ریاست کا ہر بچہ ان کے جائز مطالبات کے ساتھ کھڑا ہے۔
وزیر اعلیٰ نے کہا کہ چاہے وہ کانگریس ہو یا سماج وادی پارٹی، ان کا چہرہ غیر جمہوری ہے۔ ان کی حرکتیں خواتین مخالف ہیں۔ وزیر اعظم نریندر مودی نے انہیں اپنی خواتین مخالف شبیہہ اتارنے کے لیے ایک آپشن کی پیشکش کی، لیکن انھوں نے اس کا غلط استعمال کرنے کی کوشش کی۔ اسی لیے کانگریس اور اس کی اتحادی جماعتوں کے خلاف آج ملک بھر میںان کی خواتین مخالف رویے کے خلاف احتجاج کیا جارہا ہے۔ اس شدید گرمی کے باوجود خواتین کی بڑی تعداد اس عوامی غم و غصے کی ریلی میں شامل ہوئی۔ آپ کی موجودگی وزیر اعظم مودی کی پالیسیوں کے لیے حمایت اور آشیرواد کی علامت ہے۔