تیز رفتار کار قیامت بن گئی، جے سی بی سے ٹکراتے ہی اُڑ گئے پرخچے — ایک نوجوان جاں بحق، تین زندگی اور موت کی کشمکش میں

مظفرپور  (نزہت جہاں)

ضلع کے صدر تھانہ علاقے میں ہفتہ کی صبح ایک ایسا ہولناک سڑک حادثہ پیش آیا جس نے پورے علاقے کو دہلا کر رکھ دیا۔ گوبرسہی-ڈمری روڈ پر ایک بے قابو اور تیز رفتار کار سڑک کنارے کھڑی جے سی بی اور بجلی کے پول سے زبردست انداز میں ٹکرا گئی۔ ٹکر اتنی خوفناک تھی کہ کار مکمل طور پر تباہ ہو گئی۔ اس دردناک حادثے میں ایک نوجوان کی موقع پر ہی موت ہو گئی، جبکہ تین دیگر شدید زخمی ہو گئے ہیں۔  مقامی لوگوں کے مطابق صبح تقریباً 4 بجے ہونے والے اس حادثے کی آواز اتنی خوفناک تھی کہ آس پاس کے لوگ گھبرا کر نیند سے جاگ گئے۔ لوگ دوڑتے ہوئے جب جائے حادثہ پر پہنچے تو منظر انتہائی دل دہلا دینے والا تھا۔ کار کا اگلا حصہ مکمل طور پر پچک چکا تھا اور اندر پھنسے نوجوان خون میں لت پت مدد کے لیے چیخ رہے تھے۔

حادثے میں جاں بحق ہونے والے نوجوان کی شناخت صدر تھانہ علاقے کے پرمانند پور پوربی گاؤں کے رہنے والے راج کشور ساہ کے 27 سالہ بیٹے منوج کمار ساہ کے طور پر ہوئی ہے۔ زخمی ہونے والے تینوں افراد بھی اسی گاؤں کے رہنے والے بتائے جا رہے ہیں۔ شبہ ظاہر کیا جا رہا ہے کہ خالی سڑک اور انتہائی تیز رفتار کی وجہ سے ڈرائیور گاڑی پر قابو کھو بیٹھا اور کار سیدھی کھڑی جے سی بی سے جا ٹکرائی۔

حادثے کی اطلاع ملتے ہی صدر تھانہ پولیس فوراً موقع پر پہنچ گئی۔ مقامی لوگوں کی مدد سے کار میں پھنسے زخمیوں اور لاش کو بڑی مشقت کے بعد باہر نکالا گیا۔ زخمیوں کو فوری طور پر اسپتال میں داخل کرایا گیا، جبکہ متوفی کی لاش پوسٹ مارٹم کے لیے SKMCH بھیج دی گئی۔

صدر تھانہ انچارج نوَلیش کمار نے بتایا کہ پولیس نے حادثہ زدہ گاڑیوں کو ضبط کر لیا ہے اور معاملے کی قانونی جانچ جاری ہے۔