تاثیر 20 مئی ۲۰۲۶:- ایس -ایم- حسن
بھوپال، 20 مئی: ہندوستانی انڈر 18 خواتین ہاکی ٹیم نے بدھ کو بھوپال کے ادھو داس مہتا (بھائی جی) سنٹرل ایس اے آئی سینٹر میں کھیلے گئے چار میچوں کی سیریز کے فائنل میچ میں آسٹریلیا کی انڈر 18 خواتین ہاکی ٹیم کو 1-4 سے شکست دے کر شاندار جیت درج کی۔
آسٹریلیا نے میچ کا آغاز جارحانہ انداز میں کیا، پہلے کوارٹر کے آٹھویں منٹ میں ارورہ کووسویچ نے گول کر کے اسے 0-1 کی برتری دلا دی۔ تاہم، ہندوستان نے تیزی سے جوابی حملہ کیا اور کپتان سویٹی کجور نے 13ویں منٹ میں گول کرکے اسکور 1-1 سے برابر کردیا۔
ہندوستان نے دوسرے کوارٹر میں اپنا غلبہ جاری رکھا، دیا نے 25ویں منٹ میں شاندار گول کر کے ہندوستان کو 1-2 کی برتری دلائی، جسے اس نے ہاف ٹائم تک برقرار رکھا۔
دوسرے ہاف میں بھی ہندوستانیوں نے میچ پر مکمل کنٹرول برقرار رکھا۔ تیسرے کوارٹر کے 44ویں منٹ میں پرینکا منج نے گول کر کے برتری کو 1-3 کر دیا۔ اس کے بعد فائنل کوارٹر میں نوشین ناز نے 50ویں منٹ میں گول کر کے ہندوستان کی شاندار فتح کو 1-4 سے اپنے نام کر لیا۔