تاثیر 09 جون ۲۰۲۶:- ایس -ایم- حسن
کولکاتا، 9 جون: مغربی بنگال میں تقریباً چار سال کے تعطل کے بعد مہاتما گاندھی قومی دیہی روزگار ضمانت اسکیم (منریگا) کو آج سے دوبارہ شروع کر دیا گیا ہے۔ مرکزی حکومت نے جون 2026 کے لیے ریاست میں 1.53 کروڑ انسانی دنوں کے روزگار کا بجٹ منظور کیا ہے، جس کے تحت تقریباً 700 کروڑ روپے مزدوری اور ترقیاتی کاموں پر خرچ کیے جائیں گے۔
حکومتی ذرائع کے مطابق اس اقدام سے ریاست کے تقریباً 2.56 کروڑ جاب کارڈ ہولڈرز کو روزگار کے مواقع ملنے کی توقع ہے۔ موجودہ یومیہ اجرت غیر ہنرمند مزدوروں کے لیے 260 روپے، نیم ہنرمندوں کے لیے 390 روپے اور ہنرمند مزدوروں کے لیے 520 روپے مقرر کی گئی ہے۔
حکومت نے خواتین مزدوروں کی زیادہ شمولیت، آبی ذخائر کے تحفظ، بارش کے پانی کے ذخیرے، دیہی رابطہ سڑکوں کی بہتری اور غریب دیہی خاندانوں کے لیے پائیدار اثاثوں کی تعمیر کو ترجیح دینے کا اعلان کیا ہے۔
اسکیم کی بحالی کے آغاز کے طور پر ضلع ہاوڑہ کے اُلوبیریا-II بلاک کے جوئیرا گوری گرام پنچایت میں تقریباً 3.33 لاکھ روپے کی لاگت سے ایک سب مائنر کینال کی کھدائی کا کام شروع کیا گیا۔
دریں اثنا، ریاستی حکومت نے یکم جولائی 2026 سے “وکست بھارت روزگار و آجیویکا گارنٹی مشن (وی بی جی رام-جی)” شروع کرنے کی تجویز بھی پیش کی ہے، جس کے تحت دیہی مزدوروں کو سالانہ 125 دن کے یقینی روزگار کی ضمانت دی جائے گی۔ موجودہ منریگا کے تمام جاری منصوبے نئی اسکیم کے تحت برقرار رہیں گے۔