بانس کے نیچے خفیہ تہہ خانہ! 30 لاکھ روپے کی غیر ملکی بیئر برآمد، اسمگلروں کا ہائی ٹیک کھیل بے نقاب

مظفرپور: (نزہت جہاں)

بہار میں شراب بندی نافذ ہے، لیکن شراب اسمگلر نت نئے اور حیران کن طریقوں سے قانون کو چکمہ دینے کی کوشش کر رہے ہیں۔ مظفرپور میں محکمۂ محصولات (ایکسائز) نے ایک ایسے کنٹینر کا پردہ فاش کیا ہے جسے دیکھ کر افسران بھی حیران رہ گئے۔ آسام سے آنے والے اس کنٹینر میں اوپر سے صرف بانس لدا ہوا دکھائی دے رہا تھا۔ ڈرائیور اور خَلّاسی بھی یہی دعویٰ کر رہے تھے کہ وہ صرف بانس لے جا رہے ہیں، لیکن جب محکمۂ ایکسائز کی ٹیم نے باریک بینی سے تلاشی لی تو بانس کے نیچے ایک خفیہ تہہ خانہ بنایا گیا تھا، جہاں غیر ملکی کین بیئر کا بڑا ذخیرہ چھپا کر رکھا گیا تھا۔ تلاشی کے دوران اس خفیہ خانے سے 350 سے زائد کارٹن غیر ملکی کین بیئر برآمد ہوئی، جس کی مالیت تقریباً 30 لاکھ روپے بتائی جا رہی ہے۔ محکمۂ ایکسائز کے تھانہ انچارج دیپک کمار سنگھ کو اطلاع ملی تھی کہ آسام سے شراب کی ایک بڑی کھیپ بہار لائی جا رہی ہے۔ اطلاع ملتے ہی بوچہا سے لے کر گایگھاٹ کے میٹھی ٹول پلازہ تک خصوصی جانچ مہم چلائی گئی۔ اسی دوران مجھولی علاقے میں ایک مشتبہ کنٹینر کو روک کر تلاشی لی گئی، جہاں اسمگلروں کا پورا منصوبہ بے نقاب ہو گیا۔کارروائی کے دوران کنٹینر کے ڈرائیور امت کمار اور خَلّاسی نکّی کمار کو گرفتار کر لیا گیا۔ دونوں مظفرپور کے کرجا تھانہ علاقے کے رہنے والے ہیں ابتدائی پوچھ گچھ میں انکشاف ہوا ہے کہ غیر ملکی بیئر کی یہ کھیپ مظفرپور میں ہی سپلائی کی جانی تھی۔ محکمۂ ایکسائز اب اس پورے اسمگلنگ نیٹ ورک کے ماسٹر مائنڈ اور شراب وصول کرنے والوں کی تلاش میں مصروف ہے۔ بانس کی آڑ میں بنایا گیا خفیہ تہہ خانہ پولیس کو دھوکہ دینے کے لیے تیار کیا گیا تھا، لیکن محکمۂ ایکسائز کی بروقت کارروائی نے اسمگلروں کا پورا کھیل بے نقاب کر دیا۔