تاثیر 10 جولائی ۲۰۲۶:- ایس -ایم- حسن
بیجنگ، 10 جولائی: چین کے جنوب مشرقی صوبہ فوژیان کے شہر جنجیانگ میں جوتوں کے کارخانے میں آگ لگ گئی جس کے نتیجے میں 28 افراد ہلاک اور 211 کو بحفاظت نکال لیا گیا۔ حادثے کے وقت فیکٹری کے احاطے میں کل 239 کارکن موجود تھے۔ سرکاری خبر رساں ایجنسی ژنہوا اور دیگر میڈیا رپورٹس کے مطابق آگ جمعرات کو مقامی وقت کے مطابق دوپہر کے وقت جوتے بنانے والی کمپنی ہوئٹنگ کی کثیر المنزلہ فیکٹری میں لگی۔ آگ اتنی تیزی سے پھیلی کہ کئی مزدور عمارت کی چھت پر پھنس گئے۔ سرکاری میڈیا کی جانب سے جاری کی گئی ویڈیوز میں عمارت سے بلند شعلے اور سیاہ دھواں آسمان کی طرف اٹھتے ہوئے دکھایا گیا ہے۔ واقعے کے وقت فیکٹری میں 239 مزدور موجود تھے۔ امدادی کارکنوں نے 213 افراد کو باہر نکالا تاہم ان میں سے دو ہسپتال میں دوران علاج دم توڑ گئے اور 26 دیگر لاپتہ مزدوروں کی لاشیں بعد میں نکال لی گئیں۔ ابتدائی تحقیقات کے مطابق آگ فیکٹری کے گراؤنڈ فلور سے لگی۔ جوتے بنانے میں استعمال ہونے والے آتش گیر مواد اور چپکنے والی اشیاء کی وجہ سے آگ پوری عمارت میں تیزی سے پھیل گئی۔ دریں اثنا، سیڑھیوں پر ذخیرہ شدہ مواد کی بڑی مقدار نے بچاؤ اور آگ بجھانے کی کوششوں میں رکاوٹ ڈالی۔