ایس ٹی ایف اور ویشالی پولیس کی مشترکہ کارروائی، دو خطرناک جرائم پیشہ افراد گرفتار

کاربائن، دیسی کٹّا اور میگزین برآمد، بڑی واردات کا منصوبہ ناکام

ایس پی شبھانک مشرا کی پریس کانفرنس، جرائم پیشہ نیٹ ورک کے خلاف کارروائی جاری

حاجی پور/ ویشالی (شرافت خان) ویشالی کے پولیس سپرنٹنڈنٹ شُبھانک مشرا نے منگل کو منعقدہ پریس کانفرنس میں بتایا کہ ضلع میں جرائم پر قابو پانے کے لیے جاری پریوینٹیو پولیسنگ مہم کے تحت کازی پور تھانہ پولیس اور ایس ٹی ایف بہار کی مشترکہ کارروائی میں دو خطرناک جرائم پیشہ افراد کو گرفتار کر لیا گیا۔ ان کے قبضے سے ایک دیسی کاربائن، ایک دیسی کٹّا اور کاربائن کا میگزین برآمد کیا گیا، جبکہ بروقت کارروائی سے ایک ممکنہ سنگین واردات کو ناکام بنا دیا گیا۔ ایس پی نے بتایا کہ 6 جولائی کو ایس ٹی ایف بہار سے خفیہ اطلاع ملی تھی کہ کازی پور تھانہ حلقہ کے دولت پور چاندی گاؤں میں کچھ افراد نے غیر قانونی اسلحہ چھپا رکھا ہے اور ان میں سے ایک ملزم درگا مندر کے قریب موجود ہے۔ اطلاع کی سنگینی کو دیکھتے ہوئے ان کی ہدایت پر صدر-1 کے سب ڈویژنل پولیس افسر سبودھ کمار کی قیادت میں ایس ٹی ایف اور مقامی پولیس کی ایک خصوصی ٹیم تشکیل دی گئی۔ پولیس ٹیم نے دولت پور چاندی واقع درگا مندر کے قریب گھیراؤ کیا تو ایک مشتبہ شخص پولیس کو دیکھتے ہی فرار ہونے کی کوشش کرنے لگا، تاہم پولیس نے مستعدی کا مظاہرہ کرتے ہوئے اسے گرفتار کر لیا۔ پوچھ گچھ کے دوران اس نے اپنی شناخت راج کپور ساہ (29 سال)، ساکن پاتے پور، تھانہ کرتاہا، ضلع ویشالی کے طور پر بتائی۔ مزید تفتیش میں گرفتار ملزم نے انکشاف کیا کہ اس واردات میں اس کا ساتھی راکیش کمار (27 سال)، ساکن دولت پور چاندی، تھانہ کازی پور بھی شامل ہے۔ اس اطلاع کی بنیاد پر پولیس نے فوری چھاپہ مار کر راکیش کمار کو بھی گرفتار کر لیا، جو پولیس کو دیکھتے ہی فرار ہونے کی کوشش کر رہا تھا۔ دونوں ملزمان کی نشاندہی پر پولیس نے چھپائے گئے غیر قانونی ہتھیار برآمد کیے، جن میں ایک دیسی کاربائن، ایک دیسی کٹّا اور کاربائن کا میگزین شامل ہے۔ پوچھ گچھ کے دوران ملزمان نے اسلحہ فراہم کرنے والے دیگر افراد کے بارے میں بھی اہم معلومات دی ہیں، جن کی گرفتاری کے لیے مختلف مقامات پر چھاپہ ماری جاری ہے۔ ایس پی شبھانک مشرا نے کہا کہ ویشالی پولیس کی مؤثر پریوینٹیو پولیسنگ کے نتیجے میں ایک ممکنہ مجرمانہ واردات کو وقوع پذیر ہونے سے پہلے ہی ناکام بنا دیا گیا۔ گرفتار دونوں ملزمان کے خلاف کازی پور تھانہ میں آرمس ایکٹ سمیت متعلقہ دفعات کے تحت مقدمہ درج کر کے انہیں عدالتی تحویل میں بھیجا جا رہا ہے۔ پریس کانفرنس میں یہ بھی بتایا گیا کہ مرکزی ملزم راج کپور ساہ کے خلاف ویشالی، مظفرپور اور دیگر اضلاع کے مختلف تھانوں میں قتل، ڈکیتی، لوٹ، آرمس ایکٹ، این ڈی پی ایس ایکٹ اور دیگر سنگین جرائم کے متعدد مقدمات پہلے سے درج ہیں۔ پولیس اب اس گینگ کے دیگر ارکان، اسلحہ سپلائرز اور معاونین کی گرفتاری کے لیے مسلسل کارروائی کر رہی ہے۔