ہوم رجسٹریشن میں ویشالی پورے بہار میں سرفہرست، 9 میں سے 7 دستاویزات کی رجسٹری ویشالی میں

حاجی پور (شرافت خان): ضلع مجسٹریٹ محترمہ ورشا سنگھ کی رہنمائی اور مسلسل نگرانی میں ریاستی حکومت کی اہم اسکیم “سب کا سمان، جیون آسان” کے تحت 80 سال یا اس سے زائد عمر کے بزرگ شہریوں کو گھر بیٹھے دستاویزات کی رجسٹری (ہوم رجسٹریشن) کی سہولت مؤثر انداز میں فراہم کی جا رہی ہے۔ اس اسکیم کے نفاذ میں ویشالی ضلع نے پورے بہار میں پہلی پوزیشن حاصل کی ہے۔

یہ اسکیم 11 جولائی 2026 کو وزیر اعلیٰ سمراٹ چودھری نے ویشالی سے شروع کی تھی، جس کا مقصد بزرگ شہریوں کو رجسٹری دفتر کے چکر لگائے بغیر ان کے گھر پر ہی رجسٹری کی سہولت فراہم کرنا ہے۔ ضلع انتظامیہ کے مطابق، ریاست بھر میں اب تک ہوم رجسٹریشن کے تحت مجموعی طور پر 9 دستاویزات کی رجسٹری مکمل ہوئی ہے، جن میں سے 7 دستاویزات صرف ویشالی ضلع میں رجسٹر کی گئی ہیں۔ اس نمایاں کارکردگی کے ساتھ ویشالی پورے بہار میں پہلے نمبر پر آ گیا ہے۔ ضلع مجسٹریٹ ورشا سنگھ نے کہا کہ اس اسکیم کا بنیادی مقصد بزرگ شہریوں کو عزت و وقار کے ساتھ آسان اور شفاف خدمات فراہم کرنا ہے، تاکہ انہیں سرکاری دفاتر کے غیر ضروری چکر نہ لگانے پڑیں۔ انہوں نے متعلقہ افسران کو ہدایت دی کہ اس سہولت کا فائدہ زیادہ سے زیادہ اہل شہریوں تک بروقت اور آسانی سے پہنچایا جائے۔ انہوں نے بتایا کہ ہوم رجسٹریشن کے عمل کی مسلسل نگرانی کی جا رہی ہے تاکہ کسی بھی مرحلے پر شہریوں کو دشواری کا سامنا نہ کرنا پڑے۔ ضلع مجسٹریٹ نے اہل شہریوں سے اپیل کی کہ وہ حکومت کی اس عوامی فلاحی اسکیم سے زیادہ سے زیادہ فائدہ اٹھائیں اور اسے کامیاب بنانے میں اپنا تعاون دیں۔