تاثیر 26 اگست ۲۰۲۶:- ایس -ایم- حسن
– پٹنہ، 26 اگست :۔ رکشا بندھن کے موقع پر وزیر اعلیٰ سمراٹ چودھری نے بدھ کے روز بہار کی بیٹیوں اور بہنوں کی عزت، تحفظ، تعلیم، بااختیار بنانے اور خود انحصاری کو فروغ دینے کے لیے تین اہم اسکیموں کا آغاز کیا۔ پٹنہ کے گیان بھون میں منعقدہ ایک تقریب میں وزیر اعلیٰ نے پولیس دیدی (ابھیا بریگیڈ) کے لیے 4,700 دو پہیہ گاڑیوں کا افتتاح کیا اور ہری جھنڈی دکھائی۔ تقریب کے دوران خواتین پولیس اہلکاروں نے وزیر اعلیٰ کو راکھیاں باندھیں۔ زیر اعلیٰ نے کہا کہ رکشا بندھن کا یہ موقع بیٹیوں اور بہنوں کی حفاظت اور عزت کے لیے حکومت کے عزم کو مزید تقویت دیتا ہے۔ انہوں نے مزید کہا کہ خواتین کی بڑھتی ہوئی شرکت خوشحال بہار کی پہچان ہے، اور حکومت کا مقصد خواتین کو اپنی صلاحیتوں کے ذریعے ریاست کی ترقی میں اہم شراکت دار بننے کے قابل بنانا ہے۔پولیس دیدی (ابھیا بریگیڈ) کے لیے 4,700 اسکوٹرس اور موٹرسائیکلوں کا افتتاح کرتے ہوئے وزیر اعلیٰ نے کہا کہ یہ گاڑیاں خواتین پولیس افسران کو خواتین کی حفاظت سے متعلق کاموں کو زیادہ مؤثر طریقے سے انجام دینے کے قابل بنائیں گی ۔ انہوں نے بتایا کہ بہار پولیس میں تقریباً 40,000 خواتین پولیس اہلکار کام کرتی ہیں۔ وزیر اعلیٰ کے مطابق ملک کی کسی اور ریاست کی پولیس فورس میں اتنی بڑی تعداد میں خواتین پولیس افسران نہیں ہیں۔تقریب کے دوران سمراٹ چودھری نے “چیف منسٹر گرل اسٹوڈنٹ پی ایچ ڈی فیلوشپ” اسکیم کا بھی آغاز کیا۔ اس اسکیم کے تحت، تقریباً 1,000 طالبات کو چار سال تک ہر ماہ 10,000 روپے کی مالی امداد ملے گی۔ وزیراعلیٰ نے کہا کہ لڑکیوں کو اعلیٰ تعلیم اور تحقیق کے بہتر مواقع فراہم کرنا حکومت کی اولین ترجیح ہے۔ اس اسکیم کا مقصد خواتین طالبات کو تحقیق کے میدان میں آگے بڑھنے کے لیے مالی مدد فراہم کرنا ہے۔وزیر اعلیٰ نے “بہار کی بیٹی اسٹارٹ اپ چیلنج اسکیم” کا بھی آغاز کیا۔ اس اسکیم کے تحت خواتین کاروباریوں کو 50,000 سے لے کر 2 لاکھ روپے تک کی مالی امداد دی جائے گی تاکہ وہ اپنی اختراعات اور منصوبوں کو آگے بڑھا سکیں۔ اس اسکیم سے 2,100 خواتین کو فائدہ پہنچنے کی امید ہے۔ وزیر اعلیٰ نے کہا کہ اس سے بہار کی خواتین میں صنعت کاری، اختراع اور خود انحصاری کو فروغ ملے گا اور انہیں اپنے کاروباری خیالات کو آگے بڑھانے کے مواقع فراہم ہوں گے۔ وزیر اعلیٰ نے کہا کہ جیویکا دیدیاں بہار کی معیشت میں اہم کردار ادا کرتی ہیں۔ ان کے مطابق ریاست میں تقریباً34لاکھ جیویکا دیدیاں کروڑ پتی بن چکی ہیں، جس سے معیشت میں تقریباً 1.36 لاکھ کروڑ روپے کا حصہ ہے۔ انہوں نے کہا کہ آنے والے سالوں میں مزید ایک کروڑ جیویکا دیدیوں کو کروڑ پتی بنانے کا ہدف ہے۔ خواتین کو روزگار اور خود روزگار سے جوڑنے کے لیے مختلف شعبوں بشمول مویشی پروری اور دودھ کی پیداوار میں مہم جاری رہے گی۔وزیر اعلیٰ نے کہا کہ بہار میں 112 ایمرجنسی سروس کا رسپانس ٹائم اب 10 منٹ سے بھی کم ہے۔ مقصد یہ ہے کہ نئے نظاموں کے نفاذ کے بعد اسے پانچ سے سات منٹ سے بھی کم کر دیا جائے۔ اس سے خواتین سمیت تمام شہریوں کو فوری ہنگامی امداد فراہم کی جا سکے گی۔ انہوں نے کہا کہ حکومت کا مقصدایک کروڑ خواتین کو روزی روٹی، ڈیری پروڈکشن، مویشی پالنا اور دیگر روزگار کی سرگرمیوں سے جوڑنا ہے۔وزیر اعلیٰ نے کہا کہ بہار میں پنچایت اور میونسپل انتخابات میں خواتین کے لیے 50 فیصد ریزرویشن ہے۔ انہوں نے دعویٰ کیا کہ ریاست میں 50 فیصد سے زیادہ یعنی تقریباً 59 فیصد خواتین عوامی نمائندوں کے طور پر منتخب ہو رہی ہیں۔ انہوں نے کہا کہ خواتین کی ترقی بہار کی ترقی کی کلید ہے۔ بیٹیوں اور بہنوں کی حفاظت، عزت، تعلیم اور خود انحصاری کو یقینی بنانا حکومت کی اولین ترجیحات میں شامل ہے۔ ہندوستھان سماچار