تاثیر 23 اگست ۲۰۲۶:- ایس -ایم- حسن
ڈھاکہ (بنگلہ دیش)، 23 اگست: بنگلہ دیش میں ایک ہندو خاندان کے چار افراد مشکوک حالات میں مردہ پائے گئے ہیں۔ شوہر، بیوی، بیٹی اور بیٹے کی لاشیں رنگ پور شہر کے علاقے کملاکشنا ماسوا پیرا کے ایک گھر سے ملی ہیں۔ پولیس نے معاملے کی گہرائی سے تفتیش شروع کر دی ہے۔
رنگ پور میٹروپولیٹن کوتوالی کے افسر انچارج نظرمل قادر نے تصدیق کی کہ رنگ پور ضلع اسکول کے سابق استاد گنپتی چکرورتی (65)، ان کی اہلیہ پریتی لتا چکرورتی (50)، ان کی بیٹی اگیا چکرورتی پرتی (23) اور ان کے بیٹے پریم چکرورتی (12) کی لاشیں ہفتہ کی رات 11 بج کر 30 منٹ کے قریب رنگ پور شہر کے داسپارہ (مچھواپارا) علاقے میں ایک بند گھر میں مشکوک حالات میں ملی ہیں۔ پولیس اور مقامی لوگوں کے مطابق گنپتی کے گھر کا دروازہ گزشتہ دو دنوں سے بند تھا۔ جب مسلسل فون کا جواب نہیںدیا گیا تو رشتہ داروں کو شک ہوا۔
مقامی لوگوں نے سنیچر کی رات تقریبا 10 بج کر 45 منٹ پر فائر سروس کو اطلاع دی۔ اس کے بعد وہ دروازہ توڑ کر گھر میں داخل ہوئے۔ پولیس کے مطابق دو لاشیں گھر کے اندر سے ملی ہیں جبکہ دو دیگر چھت کے قریب سے ملی ہیں۔ اطلاع ملنے پر رنگ پور میٹروپولیٹن جاسوس برانچ کے ڈپٹی کمشنر سناتن چکرورتی، کوتوالی افسر انچارج اسلام اور دیگر پولیس افسران نے آئی بی کی ایک ٹیم کے ساتھ گھر کو محاصرے میں لے لیا۔
رشتہ داروں نے الزام لگایا کہ خاندان کے چاروں افراد کو قتل کر دیا گیا ہے اور مطالبہ کیا کہ مجرموں کو گرفتار کر کے سزا دی جائے۔ انہیں یہ بھی شبہ ہے کہ یہ ڈاکوؤں کا کام ہو سکتا ہے۔ گھر میں موجود اشیا بکھرے ہوئے پائے گئے ہیں اور الماری کے اندر زیورات کے خانے خراب حالت میں ہیں۔ گنپتی کی کزن ملاتی چکرورتی نے الزام لگایا کہ چاروں کو قتل کیا گیا تھا۔ ڈپٹی کمشنر سناتن چکرورتی نے کہا کہ معاملے کی تحقیقات کی جا رہی ہیں۔