تاثیر 03 اگست ۲۰۲۶:- ایس -ایم- حسن
نئی دہلی، 3 اگست: انٹرنیشنل کرکٹ کونسل (آئی سی سی) کے اینٹی کرپشن ٹریبونل نے امریکی کرکٹر بودوگم اکھلیش ریڈی کو آئی سی سی اینٹی کرپشن کوڈ کی تین خلاف ورزیوں کا مجرم پائے جانے کے بعد ان پر آٹھ سال کے لیے کرکٹ کے تمام فارمیٹس سے پابندی عائد کر دی ہے۔
آئی سی سی کے مطابق یہ پابندی اکھلیش ریڈی کو عارضی طور پر معطل کیے جانے کے دن21 نومبر 2025 سے نافذ العمل سمجھی جائے گی ۔ یہ پابندی نومبر 2033 تک نافذ رہے گی۔
یہ معاملہ ابوظہبی ٹی 10 لیگ 2025 سے متعلق ہے، جہاں آئی سی سی نے امارات کرکٹ بورڈ کی جانب سے نامزد اینٹی کرپشن آفیسر (ڈی اے سی او) کے طور پر تحقیقات کی۔
تحقیقات میں اکھلیش ریڈی کو آئی سی سی اینٹی کرپشن کوڈ سیکشن 2.1.1 کا مجرم پایا گیا جو کسی میچ کے نتائج، پیشرفت، طرز عمل یا کسی دوسرے پہلو کو ٹھیک کرنے یا غیر مناسب طور پر متاثر کرنے کی کوشش سے متعلق ہے۔