نئے ڈی ایم تنئے سلطانیہ نے سنبھالا سیتامڑھی کا عہدہ

 ترقی اور عوامی مسائل کا فوری حل ترجیح

سیتامڑھی: (مظفر عالم)

ضلع سیتامڑھی کے نئے تعینات ضلع مجسٹریٹ (ڈی ایم) تنئے سلطانیہ نے جمعہ کو سبکدوش ضلع مجسٹریٹ رچی پانڈے سے ضلع مجسٹریٹ کے عہدے کا چارج سنبھال لیا۔ اس موقع پر چارج کی منتقلی سے متعلق تمام ضروری انتظامی کارروائیاں مکمل کی گئیں۔ عہدہ سنبھالنے کے بعد ضلع مجسٹریٹ تنئے سلطانیہ نے ضلع انتظامیہ سے متعلق اہم دستاویزات، ترقیاتی اسکیموں، مختلف منصوبوں اور انتظامی ترجیحات کے بارے میں معلومات حاصل کی۔ وہیں سبکدوش ضلع مجسٹریٹ رچی پانڈے نے ضلع میں جاری ترقیاتی اسکیموں، اہم منصوبوں اور انتظامی امور کی پیش رفت سے نئے ضلع مجسٹریٹ کو آگاہ کیا۔ اس موقع پر دونوں افسران نے ضلع میں انتظامی امور کو بہتر انداز میں جاری رکھنے، ترقیاتی کاموں میں تسلسل برقرار رکھنے اور عوامی مفاد سے متعلق معاملات کو ترجیحی بنیاد پر آگے بڑھانے کے سلسلے میں تبادلہ خیال کیا۔چارج سنبھالنے کے بعد میڈیا سے گفتگو کرتے ہوئے ضلع مجسٹریٹ تنئے سلطانیہ نے کہا کہ سیتامڑھی کی ہمہ جہت ترقی کو رفتار دینا ان کی اولین ترجیح ہوگی۔ حکومت کی اسکیموں اور ترقیاتی منصوبوں پر مؤثر اور مقررہ وقت کے اندر عمل درآمد یقینی بنایا جائے گا۔ انہوں نے کہا کہ ضلع کے اہم منصوبوں کی باقاعدگی سے جائزہ میٹنگ کی جائے گی اور متعلقہ محکموں کے درمیان بہتر تال میل قائم کیا جائے گا، تاکہ اسکیموں کا فائدہ مقررہ مدت میں عام لوگوں تک پہنچ سکے۔

ضلع مجسٹریٹ نے کہا کہ عوامی مسائل کا فوری اور حساس انداز میں ازالہ انتظامیہ کی اہم ترجیحات میں شامل رہے گا۔ انہوں نے کہا کہ ضلع انتظامیہ، عوامی نمائندوں، افسران اور عام شہریوں کی مشترکہ کوششوں سے سیتامڑھی کی ترقی کو نئی رفتار دینے کی کوشش کی جائے گی۔ انہوں نے انتظامی امور میں شفافیت، جواب دہی اور حساسیت کو خصوصی اہمیت دینے کی بات کہی۔ اس موقع پر ضلع انتظامیہ کے سینئر افسران سمیت دیگر متعلقہ افسران موجود تھے۔