عوامی دربار میں ڈی ایم نے سنی 81 فریادیں، سات دنوں میں کارروائی کی ہدایت

ضلع سے تھانہ سطح تک 211 درخواستوں پر ہوئی سماعت، شکایات کے حل میں کوتاہی برداشت نہیں: ڈی ایم

حاجی پور/ویشالی ۔ شرافت خان۔ عوام کی شکایات اور مسائل کے فوری حل کے مقصد سے جمعہ کے روز کلکٹریٹ واقع دفتر کے احاطے میں ضلع مجسٹریٹ ویشالی ورشا سنگھ کی صدارت میں عوامی دربار کا انعقاد کیا گیا۔ اس موقع پر ضلع کے مختلف بلاکوں سے آئے شہریوں نے اپنے مسائل براہِ راست ضلع مجسٹریٹ کے سامنے پیش کیے۔ عوامی دربار میں مجموعی طور پر 81 شکایات موصول ہوئیں، جن پر ضلع مجسٹریٹ نے سنجیدگی سے سماعت کرتے ہوئے متعلقہ افسران کو ضروری کارروائی کی ہدایت دی۔ ضلع مجسٹریٹ نے تمام متعلقہ محکمہ جاتی افسران کو ہدایت دی کہ موصولہ شکایات کی ترجیحی بنیاد پر جانچ کرتے ہوئے سات دنوں کے اندر ضروری کارروائی مکمل کریں اور کارروائی کی رپورٹ عوامی شکایات سیل کو فراہم کریں۔ انہوں نے واضح طور پر کہا کہ شکایات کے حل میں کسی بھی سطح پر غفلت یا غیر ضروری تاخیر برداشت نہیں کی جائے گی۔

عوامی دربار میں محکمۂ محصولات و اراضی اصلاحات، تعلیم، دفتر سپرنٹنڈنٹ آف پولیس، رجسٹریشن، رہائش، بجلی، خوراک و رسد، آئی سی ڈی ایس، اسلحہ، صحت، جیواِکا، ڈیزاسٹر مینجمنٹ، انتخابات اور سماجی تحفظ سمیت مختلف محکموں سے متعلق شکایات پیش کی گئیں۔ ضلع مجسٹریٹ نے افسران کو ہدایت دی کہ تمام معاملات کی ترجیحی بنیاد پر جانچ کرتے ہوئے فوری، شفاف اور مقررہ مدت کے اندر حل کو یقینی بنایا جائے۔ سات نشچَے-3 کے تحت ’سب کا احترام، زندگی آسان‘ پروگرام کے تحت ضلع، سب ڈویژن، بلاک اور تھانہ سطح پر عوامی دربار کا باقاعدگی سے انعقاد کیا جا رہا ہے۔ جمعہ کے روز ضلع سے لے کر تھانہ سطح تک مجموعی طور پر 211 درخواستوں کا جائزہ لیتے ہوئے ان کے حل کی کارروائی یقینی بنائی گئی۔ ضلع مجسٹریٹ ورشا سنگھ نے کہا کہ عام شہریوں کے مسائل کا فوری، شفاف اور مقررہ مدت میں حل ضلع انتظامیہ کی اولین ترجیح ہے۔ عوامی دربار ایک ایسا مؤثر پلیٹ فارم ہے جہاں شہری براہِ راست انتظامیہ کے سامنے اپنی شکایات پیش کر سکتے ہیں۔ انہوں نے افسران کو ہدایت دی کہ شکایات کے حل میں پوری حساسیت اور سنجیدگی کا مظاہرہ کریں اور مقررہ مدت کی سختی سے پابندی یقینی بنائیں، تاکہ عام لوگوں کو اپنی شکایات کے حل کے لیے بار بار سرکاری دفاتر کے چکر نہ لگانے پڑیں۔

عوامی دربار میں اسسٹنٹ کلکٹر (زیرِ تربیت) انکور ترپاٹھی، ایڈیشنل کلکٹر ویشالی، سب ڈویژنل افسر حاجی پور، ضلع سپلائی افسر، ڈائریکٹر ڈی آر ڈی اے، ضلع ترقیاتی افسر، ضلع کوآپریٹو افسر، ڈپٹی کلکٹر لینڈ ریفارمز، سینئر ڈپٹی کلکٹر، اسسٹنٹ ڈائریکٹر ضلع سماجی تحفظ سیل، ضلع پروگرام افسر محکمۂ تعلیم، ضلع بہبود افسر سمیت مختلف محکموں کے متعلقہ افسران موجود تھے۔