تاثیر 22 ستمبر ۲۰۲۶:- ایس -ایم- حسن
ممبئی ، 22 ستمبر : نوجوانوں کو روزگار کے مواقع فراہم کرنے کے مقصد سے ویرار مغرب کے یشونت نگر میں واقع امے کلاسک کلب میں یکم اکتوبر کو روزگار میلے کا انعقاد کیا جائے گا۔ یہ میلہ صبح 9 بجے سے دوپہر 2 بجے تک جاری رہے گا، جس میں متعدد معروف بینکوں اور کمپنیوں کی جانب سے مختلف شعبوں میں ملازمت کے مواقع فراہم کیے جائیں گے۔ اس موقع پر وسئی ویرار عظیم شہری ادارے کے پہلے میئر اور صنعت کار راجیو پاٹل بھی خصوصی طور پر موجود رہیں گے۔سماجی کارکن اور سابق میونسپل کونسلر ہاردک راوت نے بتایا کہ روزگار میلے میں دسویں، بارہویں جماعت پاس کرنے والے نوجوانوں کے علاوہ ڈگری حاصل کرنے والے امیدوار بھی شرکت کرسکیں گے۔ امیدواروں کے لیے عمر کی حد 18 سے 45 سال مقرر کی گئی ہے۔ میلے میں بینکاری اور مالیات، صارفین کی خدمت، فروخت اور تشہیر، انتظامی امور، دفتری معاونت، خوردہ تجارت سمیت مختلف شعبوں میں روزگار کے مواقع دستیاب ہوں گے۔روزگار میلے میں آئی سی آئی سی آئی بینک، ایکسس بینک، کوٹک مہندرا بینک، آئی ڈی ایف سی فرسٹ بینک، ڈی سی بی بینک، بندھن بینک اور آدتیہ برلا بینک سمیت دیگر اداروں کی شرکت متوقع ہے۔ منتظمین نے روزگار کے خواہش مند امیدواروں سے اپیل کی ہے کہ وہ میلے میں شرکت کے لیے پیشگی اندراج کرائیں۔