تاثیر 14 ستمبر ۲۰۲۶:- ایس -ایم- حسن
سلی گوڑی، 14 ستمبر: شہر سے متصل پھول باڑی مہانندا بیراج میں اتوار کو ڈوبنے والے دو طلبہ کی تلاش پیر کی صبح سے مزید تیز کر دی گئی ہے۔ تلاش اور بچاؤ کی اس مہم میں قومی ڈیزاسٹر رسپانس فورس (این ڈی آر ایف)، سول ڈیفنس اور پولیس کی ٹیمیں شامل ہیں۔ اسپیڈ بوٹ اور غوطہ خوروں کی مدد سے مہانندا ندی میں تلاش کی جا رہی ہے، جبکہ ندی کے مختلف حصوں میں پیدل بھی تلاش جاری ہے۔ تاہم اب تک دونوں طلبہ کا کوئی سراغ نہیں مل سکا ہے۔
معلومات کے مطابق اتوار کو تین دوست پھول باڑی مہانندا بیراج میں نہانے کے لیے ندی میں اترے تھے۔ عینی شاہدین کے مطابق انہیں ندی میں جانے سے منع کیا گیا تھا، لیکن وہ نہیں مانے۔ اسی دوران ندی کے گہرے حصے میں ایک طالب علم بہنے لگا۔ اسے بچانے کی کوشش میں باقی دونوں طلبہ بھی مشکل میں پھنس گئے۔