تاثیر29 ستمبر ۲۰۲۶:- ایس -ایم- حسن
لکھنؤ، 29 ستمبر: کسانوں کو بہتر مارکیٹ معلومات فراہم کرنے اور منڈی نظام کو زیادہ شفاف بنانے کی سمت میں اتر پردیش کی یوگی حکومت کی ڈیجیٹل پہل کو نئی تقویت ملی ہے۔ ریاست کی تمام 251 زرعی پیداوار منڈیاں اب ملک کے زرعی مارکیٹ انفارمیشن نیٹ ورک ’ایگ مارک نیٹ 2.0‘ سے منسلک ہوگئی ہیں۔
اتر پردیش منڈی پریشد کے ای-منڈی پورٹل کا ایگ مارک نیٹ 2.0 کے ساتھ اے پی آئی پر مبنی انضمام مکمل ہونے کے بعد ریاست کی تمام منڈیوں سے 100 فیصد مارکیٹ رپورٹنگ یقینی ہوگئی ہے۔ مرکزی حکومت کی وزارت زراعت و کسان بہبود نے منڈی پریشد کی اس کامیابی کی ستائش کی ہے۔
یہ اطلاع منگل کو اتر پردیش منڈی پریشد کے ڈائریکٹر جتیندر پرتاپ سنگھ نے ایک پریس ریلیز کے ذریعے دی۔ یوگی حکومت ریاست کے منڈی نظام میں ٹیکنالوجی کے زیادہ سے زیادہ استعمال کے ذریعے کسانوں اور تاجروں تک خدمات اور مارکیٹ سے متعلق معلومات کی رسائی آسان بنانے کی سمت میں کام کر رہی ہے۔ ای-منڈی نظام کے ذریعے منڈیوں کے مختلف امور کو ڈیجیٹل پلیٹ فارم پر لایا گیا ہے۔ اب اسے قومی زرعی مارکیٹ انفارمیشن نیٹ ورک سے جوڑنے کے بعد اتر پردیش کی منڈیوں میں درج زرعی پیداوار کی قیمتوں اور آمد کے اعداد و شمار قومی سطح پر دستیاب ہونے لگے ہیں۔