یو ایم ایس گوتھرا میں سڑک کی حفاظت کے حوالے سے بچے اور مقامی لوگ ہوئے بیدار

محفوظ سنیچر کے تحت سڑک کے اشاروں کی جانکاری کے ساتھ فرضی مشق کا انعقاد

ٹھاکرگنج (محمد شاداب غیور)۔

وزیر اعلیٰ اسکولی تحفظ پروگرام کے تحت سنیچر کے روز اپ گریڈڈ مڈل اسکول، گوتھرا میں سڑک کی حفاظت کے موضوع پر بیداری پروگرام کا انعقاد کیا گیا۔ اسکول کی معلمات نگما شاہین اور ترنم بیگم نے جماعت ششم سے ہشتم تک کے طلبہ و طالبات کو مختلف سڑک اشاروں کے ذریعے ٹریفک قوانین اور سڑک کی حفاظت کی باریکیوں سے واقف کرایا۔ اس دوران فرضی مشق (موک ڈرل) کے ذریعے بچوں کو سڑک پر محفوظ آمد و رفت کے عملی طریقے بھی سمجھائے گئے۔ پروگرام کے دوران معلمات نے مختلف سڑک اشاروں کے معنی واضح کرتے ہوئے بچوں کو رفتار کی حد، رکنے کے اشارے، راستہ دینے، داخلہ ممنوع ہونے اور دائیں یا بائیں مڑنے جیسے ٹریفک قوانین کی جانکاری دی۔ اس کے ساتھ ہی سڑک پار کرتے وقت احتیاط برتنے اور ٹریفک اشاروں پر عمل کرنے کی اہمیت کو بھی اجاگر کیا گیا۔ پروگرام کی خاص بات یہ رہی کہ اسکول کے آس پاس کے کئی دیہی باشندوں نے بھی اس میں حصہ لیا۔ انہوں نے سڑک کی حفاظت سے متعلق اشاروں کو دیکھا، ان کے معنی سمجھے اور محفوظ ٹریفک نظام کے لیے ضروری احتیاطی تدابیر کی معلومات حاصل کیں۔ اس طرح اسکول کا احاطہ بچوں کے ساتھ ساتھ دیہی برادری کے لیے بھی سڑک کی حفاظت سے متعلق بیداری کا مرکز بن گیا۔