تاثیر24 اکتوبر ۲۰۲۶:- ایس -ایم- حسن
دہرادون، 24 اکتوبر: اتر پردیش کے سابق وزیر اعلیٰ اور سماج وادی پارٹی کے قومی صدر اکھلیش یادو کے اتراکھنڈ کے لوگوں سے متعلق ایک بیان پر سیاسی تنازع کھڑا ہوگیا ہے۔ اتراکھنڈ کے وزیر اعلیٰ پشکر سنگھ دھامی نے اکھلیش یادو کے بیان کی سخت مذمت کرتے ہوئے اسے دیوبھومی کے وقار اور وہاں کے لوگوں کی توہین قرار دیا ہے۔
اکھلیش یادو نے صحافیوں سے بات چیت کے دوران کہا تھا کہ ’’اتر پردیش میں سب سے بڑے درانداز کون ہیں؟ اتراکھنڈ کے لوگ۔ اس لیے درانداز کی تعریف طے کرنی ہوگی۔‘‘
دھامی نے اس بیان پر ردعمل ظاہر کرتے ہوئے سوشل میڈیا پلیٹ فارم ’ایکس‘ پر ایک پوسٹ میں کہا کہ اتراکھنڈ دیوبھومی ہونے کے ساتھ ساتھ ویر بھومی بھی ہے۔ اس مقدس سرزمین نے ملک کو متعدد سنت، فوجی اور قومی خدمت کے لیے وقف شخصیات دی ہیں۔ انہوں نے کہا کہ اتراکھنڈ کے لوگوں کو درانداز کہنا ریاست کے وقار اور ان کی جدوجہد کی توہین ہے۔
وزیر اعلیٰ دھامی نے اتراکھنڈ ریاستی تحریک کے دوران مظفر نگر کے رام پور ترہا میں ہونے والی فائرنگ کا بھی ذکر کیا۔ انہوں نے کہا کہ جب اکھلیش یادو کے والد ملائم سنگھ یادو اتر پردیش کے وزیر اعلیٰ تھے، اس وقت الگ اتراکھنڈ ریاست کا مطالبہ کرنے والے تحریک کاروں پر رام پور ترہا میں گولیاں چلائی گئی تھیں۔ ریاستی تحریک کے دوران مظاہرین پر فائرنگ کے واقعے کو اتراکھنڈ کے لوگ آج بھی نہیں بھولے ہیں۔