تاثیر21 اکتوبر ۲۰۲۶:- ایس -ایم- حسن
سنگھواڑہ دربھنگہ (محمد مصطفٰی) سمری تھانہ علاقے کے گووندپور بستواڑہ سڑک پر واقع امبیکا جیولرس میں منگل کے روز دن دہاڑے تقریباً 19 لاکھ روپے مالیت کے سونے کے زیورات کی ٹھگی کا معاملہ سامنے آیا ہے۔ گاہک بن کر آئے ایک بدمعاش نے زیورات دکھانے کے بہانے تقریباً 120 گرام سونے کے زیورات غائب کر دیے۔ اس کے بعد دکان کے باہر رائل اینفیلڈ ہنٹر بائیک لے کر کھڑے اپنے ساتھی کے ساتھ فرار ہو گیا۔ اس معاملے میں دکان کے مالک سنجے ٹھاکر کی درخواست پر بدھ کے روز سمری تھانے میں ایف آئی آر درج کر لی گئی ہے۔درخواست کے مطابق یہ واقعہ منگل کی دوپہر تقریباً 12:25 سے 12:50 بجے کے درمیان پیش آیا۔ اس وقت دکان پر مالک کے بھائی رگھوونش کمار ٹھاکر موجود تھے۔ ایک نوجوان سونے کی بالی خریدنے کے بہانے دکان پر پہنچا اور مختلف ڈیزائن کے زیورات دکھانے کو کہا۔ اسی دوران باتوں میں الجھا کر اس نے سونے کی چین کے نو پیس والے پیکٹ سمیت جھمکا، نتھیا، ٹیکا اور انگوٹھی کے پیکٹ غائب کر دیے۔بتایا جاتا ہے کہ ملزم اس سے پہلے سمری کی دیگر زیورات کی دکانوں پر بھی گیا تھا۔ لال بابو جیولرس کے مالک کے بیٹے سمن کمار ساہ کو شک ہونے پر انہوں نے دکاندار کو اطلاع دی، لیکن اس وقت تک ملزم فرار ہونے لگا تھا۔ دکاندار کے بھائی اور سمن کمار ساہ نے اس کا پیچھا کیا، تاہم بدمعاش قومی شاہراہ این ایچ 27 کی جانب فرار ہو گیا۔واقعے کی اطلاع ملتے ہی سمری تھانہ انچارج اروند کمار پولیس فورس کے ساتھ موقع پر پہنچے۔ پولیس دکان اور آس پاس نصب سی سی ٹی وی کیمروں کی فوٹیج کھنگال رہی ہے۔ تھانہ انچارج نے بتایا کہ ایف آئی آر درج کر لی گئی ہے۔ سی سی ٹی وی فوٹیج اور موٹر سائیکل کی بنیاد پر ملزمان کی شناخت کرکے گرفتاری کے لیے کارروائی کی جا رہی ہے۔ تھانہ سے محض چند سو میٹر کی دوری پر پیش آنے والے اس واقعے سے مقامی دکانداروں میں دہشت کا ماحول ہے