تاثیر1 اکتوبر ۲۰۲۶:- ایس -ایم- حسن
نئی دہلی، یکم اکتوبر: ٹیم انڈیا کے اوپنر روہت شرما کی نظریں 2027 میں ہونے والے آئی سی سی مردوں کے کرکٹ ورلڈ کپ پر مرکوز ہیں۔ ٹورنامنٹ کے شیڈول کا اعلان آج رات 8:30 بجے جیو ہاٹ اسٹار اور اسٹار اسپورٹس نیٹ ورک پر کیا جائے گا۔ جیو اسٹار سے گفتگو میں روہت نے کپتان شبھمن گل، 2027 ورلڈ کپ کی تیاریوں اورہندوستان کے لیے ایک اور ورلڈ کپ جیتنے کی اپنی خواہش پر بات کی۔
شبھمن گل کی کپتانی کے بارے میں روہت نے کہا کہ گل کا کرکٹنگ دماغ شاندار ہے اور بطور کپتان ابھی ان کی کارکردگی کا جائزہ لینا جلد بازی ہوگی۔ انہوں نے کہا، ’’شبھمن گل کا کرکٹنگ دماغ شاندار ہے، اس میں کوئی شک نہیں۔ وہ تقریباً ایک سال سے کپتانی کر رہے ہیں، اس لیے اتنی جلدی بطور کپتان ان کا جائزہ لینا مناسب نہیں ہوگا۔ لیکن میں نے انہیں جتنا دیکھا ہے، وہ متاثر کن رہے ہیں۔ وہ جو چاہتے ہیں، اسے لے کر بہت واضح ہیں۔ کپتان کے لیے یہ سب سے اہم چیز ہے۔ اگر کپتان واضح ہو تو اس کے اردگرد کے کھلاڑی بھی واضح رہیں گے۔ شبھمن کے ساتھ مجھے یہی نظر آتا ہے۔ وہ جانتا ہے کہ اسے کیا چاہیے اور صحیح سمت میں آگے بڑھ رہا ہے۔ یقیناً کسی بھی کپتان کو کھلاڑیوں اور معاون اسٹاف کی حمایت کی ضرورت ہوتی ہے۔ مجھے یقین ہے کہ میں جس بھی طرح اس کی مدد کر سکتا ہوں، کروں گا۔‘‘