تاثیر5 اکتوبر ۲۰۲۶:- ایس -ایم- حسن
غازی آباد، 5 اکتوبر: اتر پردیش کے غازی آباد ضلع کے رام لیلا میدان میں ایک عمارت میں راون کا پتلا بناتے ہوئے پٹاخے پھٹنے سے آگ لگ گئی۔ فائر بریگیڈ کو اطلاع ملی کہ پٹاخہ کی دکان میں آگ لگ گئی ہے۔ آگ پر قابو پانے کے لیے فائر بریگیڈ کی تین گاڑیاں موقع پر پہنچ گئیں۔ واقعے میں عمارت کی دو دیواریں گر گئی ہیں اور پانچ افراد شدید زخمی ہوئے ہیں۔ انہیں علاج کے لیے دہلی کے ایک اسپتال میں داخل کرایا گیا ہے۔چیف فائر آفیسر سوربھ سنگھ نے بتایا کہ پیر کی صبح 9.26 فائر اسٹیشن صاحب آباد کو اطلاع ملی کہ رام لیلا میدان شنی چوک پر پٹاخے کی دکان میں آگ لگ گئی ہے۔ انہوں نے کہا کہ اطلاع کی بنیاد پر تین فائر ٹینڈرز کو موقع پر روانہ کیا گیا۔ انہوں نے بتایا کہ موقع پر پہنچنے پر پتہ چلا کہ آگ کسی آتش بازی کی دکان میں نہیں بلکہ رام لیلا میدان شنی چوک کے پچھلے حصے میں واقع کمیونٹی سینٹر کی عمارت کے ایک بڑے ہال میں لگی ہے۔ فائر ڈپارٹمنٹ نے فائر ٹینڈرز کی مدد سے فوری طور پر آگ پر قابو پالیا۔انہوں نے کہا کہ آگ کو مکمل طور پر بجھانے اور ٹھنڈا کرنے کے بعد فائر بریگیڈ کی ٹیم نے جائے وقوع کا معائنہ کیا تو پتہ چلا کہ رام لیلا تقریب کے لیے ہال کے اندر راون کا پتلا بنایا جا رہا تھا۔ یہ ممکن ہے کہ پتلا بنانے میں آتش بازی یا دیگر دھماکہ خیز مواد کا استعمال کیا گیا ہو، جس کی وجہ سے دھماکہ اور آگ لگی ہو۔ دھماکے کی وجہ سے عمارت کی دو دیواریں گر گئیں۔ اس واقعے میں پانچ افراد زخمی ہوئے۔ زخمیوں میں سے ایک کی شناخت رشبھ اور دوسرے کی شناخت ہریندر کے طور پر ہوئی ہے۔ تین کی شناخت ابھی باقی ہے۔ انہیں علاج کے لیے دہلی کے ایک اسپتال میں داخل کرایا گیا ہے۔