تاثیر5 نومبر ۲۰۲۶:- ایس -ایم- حسن
بارہ بنکی، 5 نومبر: دیوا میلہ و نمائش 2026 کی میگا نائٹ بدھ کی شب بالی ووڈ گلوکار جاوید علی کے نام رہی۔ اپنی سریلی آواز اور شاندار گائیکی سے انہوں نے ایسا سماں باندھا کہ پورا پنڈال تالیوں کی گڑگڑاہٹ سے گونج اٹھا۔ ان کے مقبول گیتوں پر ناظرین دیر رات تک جھومتے رہے۔
اسٹیج پر پہنچتے ہی حاضرین نے جاوید علی کا زبردست استقبال کیا۔ انہوں نے ’جشن بہارا‘، ’تو جو ملا تو ہو گیا سب حاصل‘، ’کن فیکن‘، ’عرضیاں‘، ’تو ہی حقیقت‘، ’شری ولی‘، ’تم تک‘، ’تیرا دیدار ہوا‘ اور ’نگاڑا‘ جیسے مشہور گیتوں کی شاندار پیشکش کی۔ وہیں ’ابھی نہ جاؤ چھوڑ کر‘ گیت نے سامعین کو خاص طور پر مسحور کر دیا۔ رومانوی اور صوفیانہ گیتوں پر شائقین تالیاں بجاتے ہوئے ان کی آواز میں آواز ملاتے نظر آئے۔
جاوید علی کی بلند آواز اور جذبات سے بھرپور گائیکی نے اس ثقافتی شام کو یادگار بنا دیا۔ پروگرام میں ان کے میوزک گروپ کے فنکاروں نے بھی مختلف سازوں پر شاندار سنگت کی۔