تاثیر2 نومبر ۲۰۲۶:- ایس -ایم- حسن
گورکھپور، 2 نومبر: اترپردیش کے وزیر اعلیٰ یوگی آدتیہ ناتھ نے افسران کو ہدایت دی ہے کہ آئی جی آر ایس (مربوط شکایات کے ازالے کا نظام) پورٹل پر غلط رپورٹ درج کرنے والوں کے خلاف سخت کارروائی کی جائے۔ انہوں نے کہا کہ ہر متاثرہ شخص کی شکایت پر حساسیت کے ساتھ توجہ دی جائے اور اس کا مقررہ وقت میں شفاف طریقے سے ازالہ یقینی بنایا جائے۔
وزیر اعلیٰ نے پیر کی صبح گورکھ ناتھ مندر میں مسلسل دوسرے دن عوامی درشن کے دوران لوگوں سے ملاقات کی اور ان کی شکایات سنیں۔ اس موقع پر تقریباً 200 افراد نے اپنی پریشانیاں اور مسائل ان کے سامنے رکھے۔ یوگی آدتیہ ناتھ نے انہیں یقین دلایا کہ ہر مسئلے کا مؤثر حل نکالا جائے گا اور کسی کو بھی گھبرانے کی ضرورت نہیں ہے۔
گورکھ ناتھ مندر احاطے میں مہنت دگ وجے ناتھ اسمرتی بھون کے باہر منعقدہ عوامی درشن کے دوران بعض لوگوں نے شکایت کی کہ آئی جی آر ایس پورٹل پر ان کے معاملات کے سلسلے میں غلط رپورٹ درج کی گئی ہے۔ اس پر وزیر اعلیٰ نے ناراضی ظاہر کرتے ہوئے متعلقہ افسران کو ہدایت دی کہ ایسی غلط رپورٹ درج کرنے والوں کے خلاف سخت کارروائی کی جائے۔وزیر اعلیٰ نے افسران کو موصول ہونے والی درخواستیں حوالے کرتے ہوئے کہا کہ ہر شکایت کا فوری، معیاری اور اطمینان بخش طریقے سے ازالہ کیا جانا چاہیے۔ زمین پر غیر قانونی قبضے کی شکایات پر انہوں نے سخت قانونی کارروائی کرنے کی ہدایت دی۔ ساتھ ہی افسران سے کہا کہ اگر کسی متاثرہ شخص کو کسی معاملے میں مسلسل پریشانی کا سامنا کرنا پڑا ہے تو اس کی بھی جانچ کی جائے اور ذمہ داروں کی جواب دہی طے کی جائے۔