Taasir Urdu News Network – Syed M Hassan 2nd Feb
نئی دہلی،2فروری: وزیراعلیٰ اروند کیجریوال آج دہلی میں ڈاکٹر بی آر امبیڈکر اسکول آف اسپیشلائزڈ ایکسی لینس کا افتتاح کریں گے۔ اس موقع پر دہلی کے نائب وزیر اعلیٰ اور وزیر تعلیم منیش سسودیا بھی موجود رہیں گے۔ ہائی ٹیک سہولیات سے لیس، یہ ڈیسو کالونی، جنک پوری میں واقع ہے۔ آئیے جانتے ہیں کہ اس اسکول میں ایسا کیا خاص ہے، جس کی دہلی حکومت گزشتہ ایک سال سے تعریف کر رہی ہے۔اس ہائی ٹیک اسکول میں گراؤنڈ فلور کے علاوہ 4 منزلہ عمارت بھی تعمیر کی گئی ہے۔ ہر عمارت جدید ٹیکنالوجی سے آراستہ وپیراستہ ہے۔ بچوں کی حفاظت کو مدنظر رکھتے ہوئے ہر عمارت میں حفاظتی اقدامات کا مکمل خیال رکھا گیا ہے۔ سیڑھیوں کے علاوہ لفٹ کا بھی انتظام ہے۔اسکول میں 112 کلاس روم ہیں۔ تمام کلاس رومز میں جدید فرنیچر نصب کیا گیا ہے۔ بچوں اور اساتذہ کے بیٹھنے کے لیے آرام دہ فرنیچر موجود ہے۔ اس سے بچوں اور اساتذہ کو کافی راحت ملے گی۔اسکول کے آڈیٹوریم میں 250 افراد کے بیٹھنے کی گنجائش ہے۔ اسکول میں منعقد ہونے والے پروگرام اس آڈیٹوریم میں منعقد کیے جائیں گے۔ آڈیٹوریم کو بھی جدید ٹیکنالوجی سے آراستہ کیا گیا ہے۔ آڈیٹوریم میں اے سی کی سہولت بھی موجود ہے۔اسکول میں ایک وسیع لائبریری کی سہولت بھی موجود ہے۔ا سکول کی کتابوں کے علاوہ بچوں کو مقابلہ جاتی امتحانات کے لیے کتابوں کا مجموعہ بھی ملے گا۔ اس کے علاوہ ہر منزل پر اسٹاف روم کا بھی انتظام ہے۔دہلی کے تمام ڈاکٹر بی آر امبیڈکر اسکولس آف اسپیشلائزڈ ایکسیلنس (ایس او ایس ای) میں داخلے کے لیے 10 فروری سے 19 فروری تک اہلیت کے امتحانات منعقد کیے جائیں گے۔ 10 فروری کو 4 پرفارمنگ آرٹس اسکول، 11 فروری کو 8 ہیومینٹی اسکول، 12 فروری کو 10 اسکل اسکول اور 13 فروری کو آرمڈ فورسز پریپریٹری اسکول اور 19 فروری کو 36 ایس آئی ایس ای میں سے 13 ایس ٹی ایم ایم (سائنس، ٹیکنالوجی، انجینئرنگ اور ریاضی) اسکول کے لیے ٹیسٹ ہوگا۔ایس او ایس ای ایس دہلی بورڈ آف اسکول ایجوکیشن (ڈی بی ایس ای) سے وابستہ ہیں اور بین الاقوامی بکلوریٹ کے ساتھ شراکت میں چلتے ہیں۔ تمام طلباء جو کلاس 8 میں ہیں ایس او ایس ای میں کلاس 9 کے لیے درخواست دے سکتے ہیں۔ اہلیت ٹیسٹ کوالیفائی کرنے کے بعد، طلباء کو اپنی پچھلی کلاس پاس کا سرٹیفکیٹ پیش کرنا ہوگا۔ تعلیمی سیشن 2023-24 کے لیے 4410 نشستیں ہیں۔نائب وزیر اعلیٰ منیش سسودیا منگل کو دہلی چھاؤنی کے مہرام نگر علاقے میں ڈاکٹر بی آر امبیڈکر اسکول آف اسپیشلائزڈ ایکسی لینس اسکول کی زیر تعمیر عمارت کا معائنہ کرنے پہنچے۔ انہوں نے وہاں موجود افسران سے بات چیت کی اور تعمیراتی کام کی پیش رفت کا جائزہ لیا۔ منیش سسودیا نے کہا کہ اس اسکول کی نئی عمارت کو بچوں کی ہمہ جہت ترقی کو مدنظر رکھتے ہوئے ڈیزائن کیا گیا ہے۔ یہ عمارت دیگر اسکولوں کی عمارت سے مختلف ہوگی۔ منیش سسودیا نے کہا کہ اس طرح کے اسمارٹ اسکولوں سے نکلنے والے بچے دنیا میں ہندوستان کا نام روشن کریں گے۔
