TAASIR NEWS NETWORK- SYED M HASSAN -02 SEPT
اجین، 2 ستمبر: کانپور کے ایک نوجوان کی مہاکال مندر علاقے کے ہوٹل ستیم میں مشتبہ حالات میں موت ہو گئی۔ وہ جمعہ کو چار دوستوں کے ساتھ مہاکال درشن کے لیے اجین آئے تھے۔
واقعہ کی اطلاع ملتے ہی مہاکال پولیس ہوٹل پہنچی اور نوجوان کو بے ہوشی کی حالت میں ضلع اسپتال پہنچایا۔ یہاں ڈاکٹروں نے اسے مردہ قرار دے دیا۔ پولیس نے لاش کو قبضے میں لے کر پوسٹ مارٹم کے لیے مردہ خانے میں رکھوا دیا ہے۔اے ایس آئی شرما نے بتایا کہ ہفتہ کی صبح 8.45 بجے پولیس کو اطلاع ملی کہ کانپور کے ایک نوجوان کی ہوٹل ستیم میں موت ہوگئی ہے۔ جب پولیس ہوٹل پہنچی تو سنتوش ولد پربھاس کمرہ نمبر 308 میں بے ہوش پڑا ملا۔ اس کے ساتھ دو دوست بھی کمرے میں تھے۔ انہوں نے بتایا کہ سنتوش کی صحت بگڑ رہی تھی اور انہیں سینے میں درد تھا۔ پولیس سنتوش کو ضلع اسپتال لے گئی جہاں ڈاکٹروں نے اس کی موت کی تصدیق کردی۔ڈاکٹروں کے مطابق سنتوش کی موت ہسپتال لانے سے پہلے ہی ہو چکی تھی۔ پولیس نے لاش پوسٹ مارٹم کے لیے رکھوائی تو دوستوں نے پوسٹ مارٹم کرانے سے انکار کردیا تاہم پولیس نے پوسٹ مارٹم کے بغیر لاش حوالے کرنے سے انکار کردیا۔ پولیس نے اہل خانہ کو اطلاع دینے کے بعد اجین بلایا ہے۔ لواحقین کی موجودگی میں پوسٹ مارٹم کے بعد لاش ورثاء کے حوالے کر دی جائے گی۔ دوستوں کے مطابق سنتوش کی موت حرکت قلب بند ہونے سے ہوئی۔ پولیس کا کہنا ہے کہ موت کی اصل وجہ پوسٹ مارٹم کے بعد ہی معلوم ہوسکے گی۔