تاثیر،۹مارچ ۲۰۲۴:- ایس -ایم- حسن
لکھنؤ، 08 مارچ: 69 ہزار اساتذہ کی بھرتی کے تحت منتخب 6800 ریزرو کیٹیگری ٹیچرس امیدواروں نے تقرری کا مطالبہ کرتے ہوئے جمعہ کو نائب وزیر اعلیٰ کیشو پرساد کی رہائش گاہ کا گھیراؤ کیا۔ اس دوران امیدواروں نے زبردست نعرے بازی بھی کی۔ کیشو پرساد کی رہائش گاہ کے سامنے پولیس کی بھاری نفری تعینات ہے۔
احتجاج کرنے والے امیدواروں کا کہنا ہے کہ محکمہ بیسک ایجوکیشن کے لوگ اور انتظامیہ اپنے وعدوں سے مکر رہے ہیں۔ پولیس انتظامیہ نے امیدواروں کو وزیر اعلیٰ سے ملاقات کی یقین دہانی کرائی تھی لیکن ان کی ملاقات تاحال نہیں ہو سکی۔ اس سے ناراض امیدوار ایک بار پھر کیشو پرساد کی رہائش گاہ پہنچ گئے اور نعرے لگانے لگے۔ بڑی تعداد میں تعینات پولیس فورس نے تمام امیدواروں کو زبردستی بس میں بٹھایا اور انہیں ایکو گارڈن کے احتجاجی مقام پر لے جا کر وہاں چھوڑ دیا۔
تحریک کی قیادت کر رہے امریندر پٹیل نے کہا کہ 69 ہزار اساتذہ کی بھرتی سے متعلق کیس کی سماعت لکھنؤ ہائی کورٹ کی ڈبل بنچ میں ہو رہی ہے۔ اس سلسلے میں وزیر تعلیم سندیپ سنگھ اور محکمہ کے افسران نے میٹنگ میں امیدواروں سے کیے گئے وعدوں کے مطابق سرکاری وکیل عدالت میں کیس پیش نہیں کر رہے ہیں بلکہ ریزرو کیٹیگری کے امیدواروں کی مخالفت کر رہے ہیں۔ یہ امیدوار چاہتے ہیں کہ انہیں وزیر اعلیٰ یوگی آدتیہ ناتھ سے ملاقات کروائی جائے۔
امریندر پٹیل نے کہا کہ 6800 ریزرو کیٹیگری کی سلیکشن لسٹ وزیر اعلیٰ کے حکم پر کی گئی جانچ کے بعد آئی ہے۔ امیدواروں کو امید ہے کہ وزیر اعلیٰ سے ان کی ملاقات کے بعد پورا معاملہ ٹھیک ہو جائے گا۔