تاثیر 23 جولائی ۲۰۲۵:- ایس -ایم- حسن
رانچی، 23 جولائی: جھارکھنڈ ہائی کورٹ کے نئے مقرر کردہ چیف جسٹس ترلوک سنگھ چوہان نے بدھ کو اپنے عہدے اور رازداری کا حلف لیا۔ راج بھون کے برسا منڈپ میں منعقدہ حلف برداری کی تقریب میں گورنر سنتوش کمار گنگوار نے انہیں حلف دلایا۔ وہ جھارکھنڈ ہائی کورٹ کے 17ویں چیف جسٹس بن گئے ہیں۔
اس پروگرام میں وزیر اعلیٰ ہیمنت سورین، اسمبلی اسپیکر رویندر ناتھ مہتو، چیف سکریٹری الکا تیواری، ہائی کورٹ کے دیگر جج، ایڈوکیٹ جنرل راجیو رنجن، ہائی کورٹ کے سینئر وکیل، اسٹیٹ بار کونسل کے چیئرمین، کونسل کے اراکین، کئی ایڈوکیٹ اور کئی انتظامی افسران موجود تھے۔
جسٹس ترلوک سنگھ چوہان نے اسکول کی تعلیم شملہ سے حاصل کی ہے اور پنجاب یونیورسٹی چنڈی گڑھ سے قانون کی تعلیم حاصل کی ہے۔ انہوں نے 1989 میں ہماچل پردیش بار کونسل میں وکیل کے طور پر رجسٹریشن کروائی۔ سال 2014 میں انہیں ہائی کورٹ کے ایڈیشنل جج کے طور پر ترقی دی گئی۔ اسی سال انہیں مستقل جج مقرر کیا گیا۔ جسٹس چوہان کی جھارکھنڈ ہائی کورٹ کے چیف جسٹس کے طور پر تقرری کا نوٹیفکیشن 15 جولائی کو صدر کے دفتر سے جاری کیا گیا تھا۔