گرونانک انسٹی ٹیوٹ آف ہوٹل مینجمنٹ کا روس اور ویتنام میں تعلیمی تبادلہ پروگرام مکمل، عالمی سطح پر سیکھنے کا نیا موقع

کولکتہ، 26/ جولائی (تاثیر بیورو) گرو نانک انسٹی ٹیوٹ آف ہوٹل مینجمنٹ اور جے آئی ایس یونیورسٹی کے طلبہ نے حال ہی میں روس اور ویتنام میں بین الاقوامی طلبہ تبادلہ پروگرام میں شرکت کے بعد کامیابی سے وطن واپسی کی۔ ان تعلیمی دوروں کا مقصد عالمی تعاون، بین الثقافتی سیکھنے اور جدید معیارات سے روشناس کرانا تھا۔ متذکرہ بالا ہوٹل مینجمنٹ کے طلبہ نے انڈو-رشین اسٹوڈنٹ ایکسچینج پروگرام کے تحت ماسکو کا دورہ کیا جہاں انہوں نے رشین انٹرنیشنل اکیڈمی فار ٹورزم (RIAT) کا دورہ کیا۔ اس دوران طلبہ نے عالمی سطح پر ہوٹلنگ اور سیاحت کے جدید تقاضوں سے واقفیت حاصل کی۔ یہ تجربہ نہ صرف ان کی پیشہ ورانہ صلاحیتوں کو بہتر بنانے کا ذریعہ بنا بلکہ بین الاقوامی معیار کے مطابق مہارتوں کو نکھارنے کا سبب بھی بنا۔

جے آئی ایس یونیورسٹی کے طلبہ کا ایک روشن خیال گروپ ہنوئی یونیورسٹی آف انڈسٹری، ویتنام کے دورے پر روانہ ہوا، جہاں انہوں نے مشترکہ تعلیمی سیشنز میں شرکت کی، جہاں جدید تعلیمی طریقہ کار اور ویتنامی تہذیب و ثقافت کو قریب سے دیکھا۔ اس تبادلہ پروگرام سے طلبہ کو عالمی نقطۂ نظر اپنانے میں مدد ملی اور ایک جامع تعلیمی ماحول فراہم ہوا۔

اس موقع پر جے آئی ایس گروپ کے ڈائریکٹر، سردار سمر پریت سنگھ نے کہا کہ “JIS گروپ میں ہمارا ماننا ہے کہ تعلیم کو سرحدوں سے بالاتر ہونا چاہیے۔ ہمارے تبادلہ پروگرام اس مقصد کے لیے ہیں کہ ہم ایسے عالمی شہری تیار کریں جو علمی لحاظ سے مضبوط، ثقافتی طور پر باشعور اور صنعت کے تقاضوں کے مطابق تیار ہوں۔”